Operaya Mem û Zîn roja 13ê Gulanê di festîvalekê de li Almanyayê tê pêşkêşkirin.
Hewlêr (Rûdaw) – Bo cara yekemîn, Operaya Mem û Zîn tê amadekirin û dê roja 13ê vê mehê (Gulan) di festîvalekê de li eyaleta Hessen a Almanyayê were pêşkêşkirin.
Mem û Zîn a Ehmedê Xanî, şahesereke wêjeya Kurdî ye, ku weke Romeo û Julieta Kurdan tê naskirin, yek ji destanên herî mezin ên Kurdî ye di dîrokê de û berî bêhtirî 300 salan hatiye nivîsandin.
Gelek lêkolîn û şîrove li ser wê destanê hatine kirin û bo ser gelek zimanan hatiye wergerandin, lê cara yekemîn ew destana Kurdî dibe Opera û dê li Almanyayê were pêşkêşkirin.
Operaya Mem û Zîn, li Almanyayê li eyaleta Hessen di Festîvala Navdewletî ya Gulanê de bi Kurdî tê pêşkêşkirin.
Di nava operaya Mem û Zînê de gelek hunermendên ji neteweyên cuda cih digirin.
Cem Idiz û Cuma Boynukara ew opera amade kirine.
Her sal bêhtirî 100 hezar kes beşdarî Festîvala Navdewletî ya Gulanê ya li eyaleta Hessen a Almanyayê dibin.
Kompanya Rain Media ku derhêner Dara Kutlay û Zelal Sever rêveberiya wê dikin, ew demeke dirêje amadekariya Operaya Mem û Zînê dikin,
Derhênerê operayê Îhsan Osman e, Soprano Ozlem Bulut, Tenor Angelo Pollak ligel Piyanîst Fiona Pollak, weke wan gelek hunermendên din têde beşar dibin.
Operaya Mem û Zînê dê roja 13 vê mehê saat 15:00 were pêşkêşkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse