Hewlêr (Rûdaw) - Yekîtiya Dildarên Kurdî (DILKURD) daxuyaniyeke piştgiriyê ji bo komxebata bi navê "Di Perwerdehiya bi Zimanê Dayikê Ber Bi Çareseriyê: Îmkan, Asteng, Pêşniyar" ku ji aliyê Şaxa Egîtîm-Senê ya Amedê ve tê lidarxistin belav kir.
Di daxuyaniyê de DILKURDê diyar kir ku ew piştgiriyê dide hemû xebatên zanistî, akademîk û civakî yên ji bo ku Kurdî bibe zimanê perwerdeyê.
Li gorî daxuyaniyê, "Atolyeya Perwerdehiya Zimanê Dayikê" ya Şaxa Egîtîm-Senê ya Amedê di warê pêşxistin û belavkirina perwerdeya Kurdî de xwedî girîngiyeke mezin e.
DILKURDê destnîşan kir ku ew her pêngava ku ji bo zindî û xurtkirina zimanê kurdî hatiye avêtin bi nirx dibîne û piştgiriya xebatên di vî warî de dike.
Di daxuyaniyê de hat gotin,"Naskirina fermî û qanûnî ya pêkhateya pirzimanî ya li Tirkiyeyê ji bo misogerkirina aştiya civakî û hemwelatîbûna wekhev gaveke girîng e."
Li gorî daxuyaniyê DILKURDê dê di navbera 12-13ê Nîsanê de li Amedê bi pêşengiya Egîtîm-Sen Şaxa Amedê beşdarî Komxebata Perwerdehiya Zimanê Dayikê bibe.
