New York (Rûdaw) - Encumena Ewlehiyê ya Neteweyên Yekbûyî doh derbarê rewşa Sûriyeyê û Rojavayê Kurdistanê de civîneke taybet li dar xist.
Di civînê de nûnerên welatên zilhêz û aliyên herêmî li ser paşeroja Sûriyeyê, rewşa mirovî ya li herêmê û tevlîbûna HSDyê ya di nav saziyên dewletê de nîqaş kirin.
Her çi qas di civînê de êrişên li ser herêmên Kurdî nehatin şermezarkirin jî, lê teqezî li ser parastina sivîlan û misogerkirina mafên kêmneteweyan hate kirin.
Nûnerên Îraq, Sûriye û Tirkiyeyeyê beşdarî civînê bûn û gotarên xwe pêşkêş kirin.
Ti welatekî Ewropayê, Rûsya û Çînê êrişên li ser Rojavayê Kurdistanê û HSDyê şermezar nekir lê wan daxwaz kir ku li Sûriyeyeyê hikûmeteke berfireh were avakirin.
Birêvebira Beşa Bersivdana Krîzan ê Neteweyên Yekbûyî Adam Worsornuyê got:
"Şer û pevçûnan xelk ji ava paqij bê par hiştiye. Hinek nexweşxane neçar mane werin girtin û gelek zarok jî nikarin biçin dibistanê."
“Kurda parçeyê neqetiyayî yê Sûriyeyê ne”
Alîkara Nûnera Amerîkayê ya Neteweyên Yekbûyî Tami Bruceyê jî got:
"Şam niha hem amade ye hem jî di wê rewşê de ye ku berpirsiyariyên ewlehiyê bigire ser milê xwe; di nav de kontrolkirina navendên girtinê û kampên DAIŞê.
Serok Ehmed Şer teqezî li ser wê yekê kiriye ku Kurd parçeyeke neqetiyayî ya Sûriyeyeyê ne.
Her wiha tevlîbûna Kurdan a di dewleta nû ya Sûriyeyeyê de mafê tam ê hevwelatîbûnê dide wan, heta ji bo wan kesên ku di demên borî de bênasname bûn.
Ev wekî parçeyek ji naskirin û parastina destûrî ya ji bo ziman û çanda Kurdî û beşdarbûna di birêvebiriyê de tê dîtin."
Alîkarê Nûnerê Fransayê yê Neteweyên Yekbûyî Jay Dharmadhikari jî got,"Divê parastina xelkê sivîl, bi taybetî sivîlên Kurd, were misogerkirin."
“Em Sûriyeyê pîroz dikin”
Balyozê Tirkiyeyeyê yê Neteweyên Yekbûyî jî got,
"Germtirîn pîrozbahiyan pêşkêşî hikûmeta Sûriyeyeyê, artêşa Sûriyeyeyê û gelê bira yê Sûriyeyeyê dikim."
Balyozê Sûriyeyeyê yê Neteweyên Yekbûyî jî li ser êrişên artêşa welatê xwe got:
"Ez dixwazim spasiya wan dewletan bikim ku bi zelalî cudahiyê dixin navbera Hêzên Sûriyeya Demokratîk (HSD) wekî milîseke çekdar ku li derveyî desthilata dewletê kar dike û gelê Kurd wekî pêkhateyeke resen û bingehîn a niştecihên Sûriyeyeyê dibînin.
“Cîhan deyndarê Kurdan e”
Balyozê Îsraîlê yê Neteweyên Yekbûyî Danny Danon jî got:
"Hikûmet ne bi gotar û sozên xwe, belkî bi kiryarên xwe û bi wê yekê tên nirxandin ka çawa miamaleyê li gel kêmnetewe û bêstargehan dikin.
Di hefteyên borî de, raporên nîgeranker ji herêmên Kurdan yên bakur û rojhilatê Sûriyeyeyê gihîştin me.
Raporên koçberiya bi zorê, binpêkirinên hovane û kuştinê. Gelê Kurd tenê têbîniyeke marjînal nîne. Ew di navbera me, di navbera cîhanê û DAIŞê de sekinîn."
Balyozê Rûsyayê yê Neteweyên Yekbûyî Vasily Nebenzya jî ji Rûdawê re got:
"Ji ber ku niha desthilateke me ya nû li Sûriyeyeyê heye û ew hewl didin Sûriyeyeke yekgirtî ava bikin ku yek artêş, yek welat û yek desthilata wê hebe.
Loma heke ev yek çêbibe û heke ji bo Kurdan jî adilane be, wê demê asayî ye."
