Hewlêr (Rûdaw) - Donald Trump ragihand ku Hêza Navneteweyî ya Aramiyê (ISF) ya li Xezeyê dê "di demek gelekî nêzîk de" dest bi çalakiyên xwe bike.
Serokê Amerîkayê Donald Trump di lûtkeya C5+1ê de ku li Koşka Spî mazûvaniya serokên dewletên Qazaxistan, Ozbekistan, Qirxizistan, Tirkmenistan û Tacîkistanê kir, pirsên li ser rojeva siyaseta derve bersivandin.
Trump amaje bi wê yekê kir ku "aştiya li Xezeyê" niha baş dimeşe û agirbest berdewam dike û diyar kir ku ew ji nêzîk ve bi welatên herêmê û hevpeymanên xwe re dixebitin.
Trump li ser pirsa ku Hêza Navneteweyî ya Aramiyê (ISF) ya ku ji bo çavdêriya agirbestê û piştre jî pêvajoya ji nû ve avakirinê li Xezeyê hatiye avakirin, dê kengî dest bi çalakiyên xwe bike, got:
"Gelekî nêzîk. Dê gelekî nêzîk dest pê bike. Pêvajoya li Xezeyê gelekî baş dimeşe."
Trump amaje bi "koalîsyona" ku welatên herêmê jî di nav de ne kir û anî ziman:
"Ev ne tiştekî demkî ye. Ev aştiyeke gelekî xurt e.
Em behsa aştiya li Rojhilata Navîn dikin, Hemas di rastiyê de beşeke biçûk a vê ye."
Trump tekezî li ser wê yekê kir ku ew hêvî dikin ku ji bilî Qazaxistanê, welatên din ên Asyaya Navîn jî tevlî Peymanên Abrahamê bibin û bi vî awayî dixwazin ew peymanê ji nû ve "çalak" bikin.
Pesnê Ehmed Şer da: Zilamekî gelekî bihêz e
Donald Trump pirseke li ser wê yekê ku gelo ew dê roja duşemê bi Serokkomarê Sûriyeyê Ehmed Şer re ku cara yekem e li Koşka Spî mazûvaniya wî dike, mijara Peymanên Abrahamê gotûbêj bikin an na jî bersivand û got:
"Belê em dê gotûbêj bikin. Bi ya min ew karekî gelekî baş dike.
Ew herêmeke zehmet e, ew jî zilamekî bihêz e.
Ez û ew gelekî baş li hev dikin."
Trump diyar kir ku di pêvajoya rakirina cezayên li ser Sûriyeyê de jî ew gelekî bi pêş ketine û anî ziman:
"Ev mijareke zehmet e lê gelek bipêşketin çêbûne.
Wekî hûn dizanin, me li ser daxwaza Tirkiyeyê, heta Îsraîlê û çend welatên din ceza rakirin.
Me ceza rakirin da ku em derfetekê bidin wan (Sûriyeyê)."
