Gelo êdî li Îranê goştê hesp, ker û hêstiran helal e?

Hewlêr (Rûdaw) - Piştî raporên ku dibêjin li Îranê ji bo serjêkirin û firotina goştê hesp, ker û hêstiran destûr hatiye dayîn, Saziya Veterîneriyê ya Îranê daxuyaniyek da.

Saziyê ragihand ku heta niha ji bo serjêkirina ajelên bi simekî yan jî firotina goştê wan ti destûr an jî pejirandin nehatine dayîn.

Di medyaya Îranê de hat ragihandin ku li hinek parêzgehên Îranê serjêkirina ajelên wekî hesp, ker û hêstiran helal e û ji ber vê yekê destûra fermî hatiye xwestin.

Saziya Veterîneriyê ya Îranê destnîşan kir ku name tenê ji bo zelalkirina pêvajoyên yasayî, olî û tenduristiyê yên pêwendîdar hatine amadekirin û bi ti awayî destûr ji bo serjêkirin an jî firotina goştê hesp, ker an jî hêstiran nehatiye dayîn.

"Yasayên heyî nehatine guhertin"

Li gorî daxuyaniya saziyê, derbarê serjêkirin û firotina berhemên wiha ti biryar nehatine dayîn.

Ji bo ku pratîkeke wiha were sepandin, pêşî pêdivî heye ku nêrîn û biryarên rayedarên olî yên pêwendîdar werin wergirtin, polîtîkayên Wezareta Çandiniyê werin destnîşankirin û rêziknameyên tenduristiyê werin amadekirin.

Her wiha, divê prosedurên yasayî ji bo avakirin û xebitandina navendên ku ajelên bi simekî lê werin xwedîkirin, bicihkirin, serjêkirin, pakêtkirin û firotin werin temamkirin.

"Destûr hîn nehatiye dayîn"

Saziya Veterîneriyê ya Îranê di daxuyaniya xwe de diyar kir ku heta niha derbarê serjêkirina ajelên bi simekî û firotina goştê wan ti destûr an jî pejirandin nehatine dayîn.

Saziyê destnîşan kir ku her biryareke paşerojê derbarê vê mijarê dê bi destnîşankirina olî, temamkirina pêvajoyên yasayî, pejirandina rayedarên pêwendîdar û amadekirin û bicihanîna rêziknameyên tenduristiyê yên pêwîst ve girêdayî be.

Li dijî serjêkirin û firotina bê destûr dê tedbîr werin girtin

Di daxuyaniyê de zelal bû ku pêvajoyên yasayî yên pêwîst heta ku biqedin û rêziknameyên pêwendîdar bikevin meriyetê, serjêkirina ajelên bi simekî û firotina goştê wan dê li gorî yasayên heyî wekî binpêkirin were hesibandin.

Hat diyarkirin ku bûyerên hatine tesbîtkirin dê ji bo tedbîrên yasayî ji saziyên pêwendîdar re werin şandin.

Saziya Veterîneriyê diyar kir ku wekî saziyeke kontrolê ya pispor ji bo tenduristiya ajelan û ewlehiya berhemên ajelan, ew pêbendbûna bi rêziknameyên olî, yasayî û tenduristiyê û her wiha parastina tenduristiya giştî û mafên xerîdaran didin pêşiya her tiştî.

Berê name ji birêvebiriyên parêzgehan re hatibûn şandin

Nameyeke ku berê ji aliyê Beşa Kontrola Tenduristiya Giştî û Ewlehiya Xwirekê ya Saziya Veterîneriyê ya Îranê ve ji birêvebiriyên veterîneriyê yên parêzgehan re hatibû şandin, derket holê.

Di belgeyê de hatiye gotin ku divê her biryareke derbarê serjêkirina ajelên bi simekî ji bo bazarên navxwe yan hinardekirinê û firotina goştê wan bi berçavgirtina nêrînên rayedarên olî, polîtîkayên Wezareta Çandiniyê, avakirina qesabxaneyên pîşesaziyê û rêziknameyên derbarê firotina goştê wan werin nirxandin.

Saziyê Veterîneriyê dubare kir ku ev name ne destûr an jî erêkirin e.