Hewlêr (Rûdaw) - Wezîrê Karên Derve yê Îranê Ebas Eraqçî li Qirxizistanê di civîna Rêxistina Hevkariya Şanghayê de axivî û got, "Em dê her welatê ku bibe çavkaniya êrişan bikin hedef."
Wî eşkere kir ku hemû welatên ku zemînê ji bo êrişên li ser axa Îranê amade dikin yan jî piştgiriyê didin wan, dê bibin "hedefên leşkerî yên rewa."
Ebas Eraqçî di serdemeke wiha de ku li herêmê û cîhanê alozî pir bûne, li hemberî operasyonên leşkerî yên li ser welatê xwe hişyariya herî tund da.
Eraqçî îro di Civîna Wezîrên Karên Derve yên Rêxistina Hevkariya Şanghayê ya ku li bajarê Çolpon-Atayê yê Qirxizistanê har kirin de, li ser doktrîna parastinê ya Îranê peyam dan.
"Bêdengî rê li ber mexdûriyetên nû vedike"
Eraqçî “bêdengiya civaka navneteweyî” ya li hemberî êrişên Amerîka û Îsraîlê yên li ser Îranê bi rengê ku "nayê qebûlkirin" pênase kir û anî zimên:
"Bêcezamana êrişên li ser van saziyên stratejîk, garantiyê ji holê radike ku sibe welatekî din nebe mexdûrê êrişkariyeke wiha."
Eraqçî diyar kir ku Îranê heta niha kanalên dîplomatîk vekirî hiştine lê bersiva van hewldanan bi êrişên leşkerî hatiye dayîn.
Wî destnîşan kir ku ev rewş zemîna dan û standinan dihejîne.
Wezîr got ku Îran ti carî nebûye aliyê ku şer daye destpêkirin û li pey çû:
"Di çarçoveya hiqûqa navneteweyî de em mafê xwe yê parastina rewa diparêzin. Her cure destdirêjiya li ser gelê Îranê ji kû derê were, dê ji bo hêzên me yên çekdar bibe hedefa rewa."
Tohmetbarkirina Amerîkayê li ser "Peymana Îslamabadê"
Eraqçî di axaftina xwe de rexneyên tund li birêvebiriya Amerîkayê girtin û got ku Washingtonê piştî demeke kurt a îmzekirina "Peymana Îslamabadê" ya ji bo bidawîkirina şer, pêbendiyên xwe bin pê kirine.
Her wiha Amerîka bi desttêwerdana (midaxele) li trafîka deryayî ya li Tengava Hurmizê û sepandina dorpêça deryayî ya neyasayî tohmetbar kir.
Wî anî zimên ku Amerîka ewlehiya keştiyên bazirganiyê ya cîhanî dixe metirsiyê.
"Welatên hevkar dê berpirsyar bin"
Eraqçî ne tenê êrişkar, her wiha ew welatên ku piştgiriya lojîstîk an stratejîk didin wan êrişan jî hişyar kirin.
Wezîr bi bîr anî ku her cure hevkariya leşkerî dê berpirsyariya navneteweyî bi xwe re bîne.
Wî destnîşan kir ku ew dê li hemberî wan faktorên ku ewlehiya Îranê dixin metirsiyê bê deng nemînin.
Eraqçî ji bo beşdarbûna lûtkeyê doh êvarî ji Tehranê bi rê ketibû û gihîştibû Qirxizistanê.
Tê pêşbînîkirin ku ew di çarçoveya civîna Rêxistina Hevkariya Şanghayê de li gel welatên herêmê dan û standinên dualî bidomîne.
