Hewlêr (Rûdaw) - 17 welatan piştgirî da peymana lihevtêgihîştinê ya Amerîka û Îranê û wan xwest Tengava Hurmizê bi lez were vekirin.
Di daxuyaniyeke hevbeş a Brîtanya, Fransa, Almanya û Îtalyayê de hat gotin, “Ev derfetek e ji bo vegerandina aramiya herêmê û aramiya aboriya cîhanî.”
Pişt re 13 welatên din jî ev daxuyanî îmze kir.
Wan welatan ji ber vê gava dîplomatîk Amerîka, Îran û her wiha navbeynkarên wekî Pakistan û Qeterê pîroz kirin.
Wan destnîşan kir ku divê dan û standinên li ser hûrgiliyan bi dawî bibin û peyman bi lez û bi awayekî berfireh were pêkanîn.
Lîderên wan welatan anî zimên ku ew amade ne piştgiriyê bidin vê pêvajoyê.
Banga vekirina Tengava Hurmizê
Wan her wiha xwest ku Tengava Hurmizê bi lez were vekirin û azadiya keştîvaniyê ya bêmerc û bêsînor vegere.
Welatên din ên ku daxuyanî îmze kiriye ev in: Japonya, Kanada, Awistralya, Belçîka, Bulgaristan, Qibris, Komara Domînîkê, Estonya, Fînlandiya, Yûnanistan, Letonya, Polonya û Portugal.
Serokan diyar kir ku ew pêbend in ku beşdarî vê hewldanê bibin.
Wan eşkere kir ku ew dê li gorî destûrên xwe, bi mîsyoneke parastinê ya serbixwe, ewlehiya keştiyên bazirganiyê biparêzin û operasyonên paqijkirina mayînan pêk bînin.
"Divê Îran nebe xwediyê çeka atomê"
Di daxuyaniyê de ducare hat destnîşankirin ku divê Îran "ti carî nebe xwediya çeka atomê".
Welatan amadebûna xwe nîşan da ku ji bo vê armancê bi Amerîka, Îran û Ajansa Navneteweyî ya Enerjiya Atomê (IAEA) re kar bikin.
Lîderên wan her wiha ragihand ku ew amade ne li beramberî gavên zelal û piştrastkirî yên Îranê yên li ser bernameya wê ya atomê cezayan rakin.
Wan soz da ku dê ji bo çareseriyeke dîplomatîk a demdirêj bi Amerîka, Îran û hevpeymanên herêmî re ji nêz ve kar bikin.
Di daxuyaniyê de piştgiriya ji bo aramî, serwerî û yekparçeyiya axa Libnanê jî hat ducarekirin û girîngiya agirbesteke bihêz hat destnîşankirin.
Aloziyên li herêmê
Piştî ku Amerîka û Îsraîlê êrişî Îranê kir aloziyên herêmê ji dawiya meha sibatê ve zêde bûn. Di wan êrişan de zêdetirî 3 hezar kesan mirin.
Tehranê jî bi êrişên li ser welatên Kendavê û Îsraîlê bersiv da.
Îranê her wiha derbasbûna di Tengava Hurmizê re sînordar kir.
Washington û Tehranê 8ê Nîsanê bi navbeynkariya Pakistanê li ser agirbesteke demkî li hev kir.
Wan pişt re ji bo bidawîkirina şer peymaneke çarçoveyî ragihand.
Tê çaverêkirin ku ev peyman 19ê Tîrmehê (înê) li Swîsreyê bi awayekî fermî were îmzekirin.
