Hewlêr (Rûdaw) - Çavkaniyekî ji Hêzên Sûriyeya Demokratîk (HSD) ji Rûdawê re ragihand ku Fermandarê Giştî yê HSDyê Mezlûm Ebdî diçe Şamê.
Çavkaniyê Hêzên Sûriyeya Demokratîk (HSD) ji Rûdawê re diyar kir ku Mezlûm Ebdî niha di rê de ye û ber bi Şamê ve diçe.
Hat ragihandin ku Mezlûm Ebdî dê li Şamê bi Serokkomarê demkî yê Sûriyeyê Ehmed Şer re bicive.
Armanca sereke ya serdana neçaverêkirî, gotûbêjkirina rêyên çareseriyê ya ji bo bidawîanîna şer û aloziyên dawî yên li herêmên rojavayê Feratê û Dêrezorê ye.
Ev serdan çima girîng e?
Hevdîtina di navbera Mezlûm Ebdî û Ehmed Şer de di demekê de pêk tê ku şer li gelek herêman gur bûye:
Binpêkirina Rêkeftinê: HSDyê doh û îro ragihandibû ku komên çekdar ên hikûmeta Şamê rêkeftina vekişînê ya ji Dêr Hafir û Meskeneyê binpê kirine û beriya dema diyarkirî êrişî hêzên wan kirine.
Şerê li Bendava Tişrînê: HSDyê ragihand ku wan 3 êrişên komên çekdar ên hikûmeta Şamê li derdora Bendava Tişrînê şikandine û 2 tank û 3 wesayîtên wan îmha kirine.
Herêma Leşkerî: Artêşa Ereban a Sûriyeyê herêma rojavayê Feratê wekî "herêma leşkerî ya girtî" ragihandibû û gefa hedefgirtina her tevgerê xwaribû.
Zexta Navneteweyî: Amerîka û welatên Ewropayê zextê li her du aliyan dikin ku vegerin ser maseya dan û standinan û Peymana 10ê Adarê bi cih bînin.
Tê çaverêkirin ku di civîna Ebdî û Şer de, mijarên wekî agirbesta mayînde, statuya HSDyê û birêvebiriya herêmên nakok werin gotûbêjkirin.
