Hewlêr (Rûdaw) - Desteya Operasyonan a Artêşa Ereban a Sûriyeyê ragihand ku ji demjimêr 13:30ê îro ve qedexeya hatûçûnê hatiye ragihandin û daxwaz ji xelkê kir ku xwe ji baregehên HSDyê dûr bixe.
Desteya Operasyonan a Artêşa Ereban a Sûriyeyê li ser platforma Xê daxuyaniyek belav kir.
Di daxuyaniyê de hat diyarkirin, "Ji demjimêr 13:30ê paşnîvro ve heta demeke nediyar li taxên Şêx Meqsûd, Eşrefiye û Benî Zêdê qedexeya hatûçûnê hatiye ragihandin."
Artêşê her wiha hişyarî da xelkê wan herêman ku xwe ji xal û baregehên Hêzên Sûriyeya Demokratîk (HSD) dûr bixin.
"Dê baregehên HSDyê werin hedefgirtin"
Desteya Operasyonan destnîşan kir ku ew dê "ji demjimêr 13:30î ve bi dijwarî dest bi hedefgirtina hejmarek baregehên HSDyê yên li wan sê taxan bikin."
Berteka YPGyê: Sivîlan wekî mertal bi kar tînin
Ev daxuyaniya Artêşa Ereban a Sûriyeyê piştî wê yekê hat ku Berpirsê Navenda Ragihandinê ya YPGyê Siyamend Elî vîdeoyek belav kir û bersiv da.
Siyamend Elî li ser hesabê xwe yê Xê got:
"Li Helebê komên nêzîkî hikûmeta Şamê avahiyên xizmetguzariya sivîl dikin baregehên leşkerî û tankan tê de bi cih dikin.
Ji wir ve jî bi top û çekên giran taxên Şêx Meqsûd û Eşrefiyeyê topbaran dikin."
Berpirsê YPGyê diyar kir ku ev kiryar binpêkirina yasayên navneteweyî ye û got:
"Bi leşkerîkirina avahiyên xizmetguzariya sivîl, bi awayekî eşkere yasayên navneteweyî bin pê dikin û bi qestî welatiyên sivîl û binesaziya wan wekî mertalên mirovî bi kar tînin ku ev tawanek e û nayê qebûlkirin."
Sêşemê ve êrişên Artêşa Ereban a Sûriyeyê yên bi tank û topan li wan her du taxên Kurdan dest pê kirine.
Li gorî Hêzên Ewlehiya Hundirîn a Helebê (Asayîş) ya ser bi Rêveberiya Xweser ve, êriş heta îro jî berdewam in.
