Hewlêr (Rûdaw) – Wezîrê Karên Derve yê Tirkiyeyê Hakan Fîdan got, “Rêça dan û standinên di navbera YPG û Şamê de girîng e.”
Hakan Fîdan di weşaneke zindî ya A Haberê de pirsên derbarê rojevê bersivandin.
“Hevdîtinên ku em dikin hene”
Fîdan li ser mijara pêwendiyên YPG û Şamê got:
“Rêça hevdîtinên di navbera YPG û Şamê de girîng e.
Wekî hûn dizanin, ev hevdîtin demekê rawestiyabûn, bi taybetî piştî midaxeleya Îsraîlê ya li başûr û ji ber hinek rûdanên din ên li herêmê.
Em li bendê ne ku hevdîtinên ku Şam bi YPGyê re dimeşîne bigihîjin xaleke diyarkirî.
Dan û standinên ku tên meşandin hene, hevdîtinên ku bi Amerîkiyan re tên kirin hene, hevdîtinên ku em dikin hene.
Em dixebitin ku ev di xalekê de bigihin cihekî.”
“Pir girîng e ku Amerîka…”
Fîdan mijara Îsraîl û Sûriyeyê jî wiha nirxand:
"Niha meseleya me ya yekem û ya herî mezin a me û Amerîkiyan ew e ku em piştrast bikin ku Îsraîl ji bo Sûriyeyê nebe gef û Sûriye jî ji bo Îsraîlê nebe gef û her kes bala xwe bide ser yekparçeyiya axê û serweriya hev.
Niha beşek ji axa Sûriyeyê di bin dagirkeriyê de ye, divê ev dagirkerî bi dawî bibe û nabe ku nêzîkatiyeke ku gefê li Sûriyeya mayî dixwe jî hebe.
Pir girîng e ku Amerîka piştgiriyê bide nîzam, refah û îstiqrara li Sûriyeyê."
