Hewlêr (Rûdaw) - Serokê Komîteya Parastin, Karên Navxwe û Karên Derve ya Meclisa Niştimanî ya Federal a Îmaratê Elî Reşîd Nueymî li ser îhtima êrişan hişyarî da Îranê.
Nueymî ragihand, eger Îran êrişeke nû li ser welatê wî bike ew amade ne "hemû rêkarên pêwîst" bigirin ber xwe û hemû bijarde li ser maseyê ne.
Di heman demê de ew pêşbînî dike ku ev şer dê wekî şerê Ukraynayê dirêj neke û berî bidawîhatina sala 2026an bi dawî bibe.
Medyaya Xelîc Newsê îro di raporekê de daxuyaniyên Serokê Komîteya Parastin, Karên Navxwe û Karên Derve ya Encumena Niştimanî ya Federal a Îmaratê Dr. Elî Reşîd Nueymî weşandin.
Dema ji Nueymî hat pirsîn ka Îmarat dê bersiva êrişeke nû ya Îranê bide an na, wî bi kurtî got: "Em dê bersiva her tiştî bidin."
"Şer wekî yê Rûsya û Ukraynayê dirêj nake"
Wî rayedarê payebilind ê Îmaratê îdia kir ku ev pevçûna leşkerî ya li gel Îranê dê wekî şerê navbera Rûsya û Ukraynayê de dirêj neke.
Nueymî pêşbînî kir ku şer berî bidawîhatina îsal biqede lê belê îhtimala derketina şerekî berfirehtir jî red nekir.
Dr. Nueymî anî zimên ku rewş girêdayî gavên serkirdayetiya Tehranê û wê paşerojê ye ku ji bo gelê xwe dixwaze.
Nueymî diyar kir ku Îmaratê ji destpêkê ve daxwaza çareseriya siyasî û rêyên dîplomatîk kiriye.
Wî destnîşan kir ku meha Kanûna Paşîn a îsal, beriya destpêkirina şer, wan bi awayekî fermî ji Tehranê re ragihandiye ku bi ti awayî xak, asman û avên wan ji bo êrişkirina ser Îranê nayên bikaranîn û Îmarat ne beşek ji vî şerî ye.
Mercên Îmaratê yên ji bo avakirina baweriyê
Derbarê îhtimala jinûveavakirina baweriya bi Tehranê re, Serokê Komîteya Parastinê ya Meclisa Niştimanî ya Federal eşkere kir:
"Her gava ji bo asayîkirina têkiliyan pêdivî bi guherîneke rasteqîn û pêngavên pratîkî heye, ne tenê destpêkirina dan û standinên bêencam."
Dr. Nueymî diyar kir ku pêkhateya desthilatê ya li Îranê piştî destpêkirina vî şerî rûbirûyî guherînan bûye û divê Tehran fêm bike ku encamên kiryarên wê tevahiya cîhanê vegirtiye.
Wî her wiha cudahî xiste navbera desthilat û gelê Îranê û got:
"Gelê Îranê jiyan û paşerojeke gelekî baştir heq dike. Em hêvîdar in ku serkirdayetiya Tehranê li ser xweşguzeraniya gelê xwe bifikire û dawî li êş û azarên wan bîne."
Aloziya leşkerî didome
Daxuyaniyên vî berpirsê Îmaratê piştî aloziyeke leşkerî ya çend mehan tên.
Piştî destpêkirina şer a di dawiya meha sibata îsal de, Îmarat rûbirûyî gelek pêlên êrişên mûşekî û dronan bûye ku sektora sivîl, balafirgeh, bender û deverên niştecihbûnê kirine armanc.
Di êrişa dawî de jî 31ê Tebaxa îsal pergala parastina asmanî ya Îmaratê balafireke bêbalafirvan a Îranê li asmanê avên herêmî yên welatê xwe têk bir.
Niha jî tevî ku hewldanên dîplomatîk didomin, Îmarat hişyariyê dide ku parastina serweriya xaka welatê wê xeta sor e û êriş bêbersiv namînin.
