Hewlêr (Rûdaw) - Endamê Komîteya Ewlehî û Parastinê ya Parlamentoya Îraqê Diyar Muftî ragihand ku asmanê Herêma Kurdistanê ne di bin kontrola Îraqê de ye.
Endamê Komîteya Ewlehî û Parastinê ya Parlamentoya Îraqê Diyar Muftî daxuyaniyek da.
Diyar Muftî eşkere kir ku Fermandarê Parastina Asmanî yê Îraqê Korgeneral Mihened Esedî agahî daye komîteyê.
Diyar Muftî di daxuyaniya xwe de destnîşan kir ku Esedî di civîna Komîteya Ewlehî û Parastinê de axiviye û wî wisa gotiye:
"Asmanê Herêma Kurdistanê ne di bin kontrola me de ye û destûr nayê dayîn ku em wî asmanî biparêzin."
Êrişên li Herêma Kurdistanê
Diyar Muftî bi bîr xist ku 28ê Sibata borî di navbera Amerîka, Îsraîl û Îranê de şer dest pê kiriye û ji wê demê ve 929 caran bi dron û mûşekan êrişî Herêma Kurdistanê hatiye kirin.
Muftî eşkere kir ku di wan êrişan de 32 kesan canê xwe ji dest da û 147 kes jî birîndar bûn.
Her wiha Muftî bi bîr anî ku ji ber gefên ewlehiyê hinek şirketên navneteweyî yên petrolê karên xwe yên li Herêma Kurdistanê rawestandine.
Muftî destnîşan kir ku ji bo parastina qadên petrolê yên li herêmê, wan ji hikûmeta Îraqê daxwaza pergala parastina asmanî kiriye.
Berdevkê Hikûmeta Îraqê Heyder Ebudî 22yê Tîrmehê daxuyaniyek dabû.
Heyder Ebudî eşkere kiribû ku Serokwezîr bi şirketên petrolê re civiyaye.
Serokwezîr ji bo ku ew dest bi karên xwe bikin garantiya pêwîst daye wan.
Radestkirina pergala ji Koreya Başûr dereng ma
Diyar Muftî diyar kir ku Fermandarê Parastina Asmanî di civîna komîteyê de daxwazek kiriye.
Fermandar xwestiye ku ji bo xurtkirina pergalên parastina asmanî budceya pêwîst ji aliyê parlamentoyê ve were dabînkirin.
Muftî da zanîn ku Îraqê ji Koreya Başûr pergala parastina asmanî ya bi navê Cheongung-IIyê (M-SAM 2) standiye.
Li gorî planê diviyabû ev pergal îsal bihata radestkirin lê belê Muftî eşkere kir ku ji ber sedemên darayî radestkirina wê dereng maye.
Muftî li ser vê mijarê jî got, "Yek ji sedemên sereke yên derengmayînê pirsgirêka fînansekirinê ye.
Taksîda yekem hatiye dayîn. Lê ji ber ku taksîda duyem hîn nehatiye dayîn, radestkirin çênebû."
Îraqê Hezîrana 2023yan bi şirketa Koreya Başûr LIG Nex1ê re peymanek îmze kiribû.
Li gorî vê peymanê, Îraqê bi bihayê 2,78 milyar dolarî pergala parastina asmanî ya Cheongung-IIyê kirîbû.
Ev pergal li dijî gefên menzîlnavîn hatiye bipêşxistin. Tê armanckirin ku ev pergal kapasîteya parastina asmanî ya Îraqê gelekî zêde bike.
Lê belê ji ber pirsgirêkên budceyê, pêvajoya radestkirinê li paşiya salnameya plankirî ma.
