Hewlêr (Rûdaw) - Artêşa Ereban a Sûriyeyê îro ragihand ku hêzên wan li gundewarê rojavayê Hisîçayê, Bendava Tişrînê ya li rojhilatê Helebê û gundewarê bakurê Reqayê bi cih bûne.
Ev gav piştî peymana agirbestê ya ku yekşemê di navbera hikûmeta Şamê û Hêzên Sûriyeya Demokratîk (HSD) de hat kirin, hat avêtin.
Fermandariya Operasyonên Artêşa Ereban a Sûriyeyê îro ji ajansa fermî ya nûçeyan a wî welatî (SANA) re ragihand ku hêzên wan li wan herên dest bi bicihbûnê kiriye.
Peymana 18ê Kanûna Paşîn, piştî çend rojên şer û pevçûnên dijwar hat.
Di wan pevçûnan de hêzên hikûmetê bi piştgiriya çekdarên eşîrên Ereb, çend herêmên stratejîk kontrol kiribûn.
Di nav wan herêman de bajarê Tebqayê, Bendava Feratê (Bendava Tebqayê), zeviyên petrolê û beşek ji parêzgehên Reqa û Dêrezorê yên li rojavayê Çemê Feratê hene.
Armanca bicihbûnê
Armanca vê bicihbûnê ew e ku desthilata hikûmeta Şamê li wan deveran were vegerandin.
Ev yek beşek e ji xalên berfireh ên peymanê ku vekişîna hêzên HSDyê ya ji bo rojhilatê Feratê, radestkirina kontrola îdarî û leşkerî ya Reqa û Dêrezorê ji bo Şamê li xwe digire.
Her wiha tewlîkirina şervanên HSDyê ya bi awayekî takekesî li nav wezaretên parastin û karên navxwe yên Sûriyeyê piştî lêkolînan, beşek ji vê peymanê ye.
Fermandariya Operasyonên Artêşa Erebî ya Sûriyeyê daxwaz ji welatiyên sivîl ên wan deveran kir ku pabendî rênîşandanên yekîneyên artêşê bin û tenê ji bo karên pêwîst derkevin derve da ku di dema bicihbûna hêzên artêşê de silamet bin.
Vegera koçberên Efrînê
Li aliyê din, rayedarên parêzgeha Helebê ragihand ku wan karwanekî otobusan amade kiriye da ku biçin Tebqayê.
Armanc ew e ku koçberên Efrînê yên ku berê ji ber tundiyê reviyabûn û li Tebqa û derdora wê bi cih bûbûn, vegerînin cih û warên wan ên li Efrînê.
Ev bipêşketin nû piştî peymana destpêkê ya Adara 2025an tên ku di navbera Serokkomarê Sûriyeyê Ehmed Şer û Fermandarê Giştî yê HSDyê Mezlûm Ebdî de hatibû îmzekirin.
Alozî di Kanûna Paşîn a 2026an de zêde bûn, piştî ku ew peyman bêyî bê bicîhanîn bi dawî bûbû.
Şam li vê peymanê wekî gavekê ber bi yekgirtina Sûriyeyê ve dinêre.
Her çi qasî hîn ne zelal e bê ka hûrgiliyên wekî lêkolînên ewlehiyê, birêvebirina xwecihî ya li deverên Kurdan ên wekî Hisîçayê û misogerkirina mafên pêkhateyan dê çawa werin cîbicîkirin.
.webp&w=3840&q=75)
