Hewlêr (Rûdaw) – Li parêzgeha Sêwazê ya Bakurê Kurdistanê zifta ku herikiye nav Rûbarê Sor Sor (Kizilirmak) li ser jiyana gelek candaran bûye gef.
Li parêzgeha qirêjeke reş tevlî Rûbarê Sor bûye û ev yek bûye sedema nerazîbûnan. Derbarê mijarê de parêzgariyê daxuyaniyek da û dibêje, ew qirêja niha tevlî çem bûye di wê astê de ye ku bandorê li hemû aliyên jiyanê bike û wan derbarê çavkaniya qirêjê de dest bi lêkolînê kiriye.
Piştî ku hinek ragihandinên xwecihî û medyayên civakî dîmenê qirêjbûna Rûbarê Sor belav kirin, Parêzgariya Sêwazê ragihand ku piştî belavbûna wan nûçeyan pêwîst dîtine daxuyaniyekê bidin.
Di daxuyaniya parêzgariyê de tê gotin ku tîmên şaredariyê, Rêveberiya Bajarvanî û Guherîna Keşûhewayê û Rêveberiya Çandinî û Daristanan bo diyarkirina sedema wê qirêjê li navçeyê dest bi lêkolînê kirine.
Parêzgariya Sêwazê dibêje: “Di lêkolînan de, hat famkirin ku zift ketiye nav ava Parka Aksu û ji wir derbasî nav Kizilirmakê bûye, ew qirêja ku di rûbar de çêbûye gef e bo ser jiyanê. Lêkolîn berdewam in. Li gor encama lêkolînan derbarê kes û saziyên ku bûne sedema vê qirêjê dê rêkarên pêwîst bên cîbicîhkirin.”
