Li ser rêya Kerkûk-Tîkrîtê trafîkê: Ji malbatekê 5 kes mirin

Hewlêr (Rûdaw) - Di qezaya trafîkê ya li ser rêya Kerkûk-Tîkrîtê de, 5 kesên ji malbatekê mirin û keçeke piçûk jî bi giranî birîndar bû.

Di nava kesên ku mirî de, pisporê nexweşiyên hundirîn û mamosteyê Zanîngeha Tîkrîtê Dr. Zeydan Caîd jî hene.

Otomobîl û barhilgira çîmentoyê li hev qelibîn

Qezaya giran a trafîkê li sînorê nahiyeya Reşad a li başûrê bajarê Kerkûkê rû da.

Berpirsê Ragihandinê yê Birêvebirya Tenduristiyê ya Selahedînê Omer Uceylî ji Rûdawê eşkere kir ku qeza di ji ber lihevqelibîna otomobîlekê û barhilgireke barkirî ya çîmentoyê de pêk hatiye.

Tenê keçeke piçûk filitî

Omer Uceylî diyar kir ku 5 kesên ji heman malbatê yên di nav otomobîlê de bûn, di cihê qezayê de mirine.

Uceylî da zanîn ku di nava kesên mirî de Dr. Zeydan Caîd ê mamosteyê Zanîngeha Tîkrîtê jî heye.

Wî destnîşan kir ku ji malbatê tenê keçeke piçûk a 6 salî ji qezayê filitiye lê ew jî bi giranî birîndar bûye.

Hat diyarkirin ku zaroka birîndar ji bo dermankirinê rakirine nexweşxaneyeke Kerkûkê.

Cenaze birin Tîkrîtê

Piştî qezayê tîmên tenduristiyê û polîs çûn cihê bûyerê.

Cenazeyê wan 5 kesan, ji bo rêkarên pêwîst birin Saziya Pizîşkiya Dadî ya Tîkrîtê.

Rêya Kerkûk-Tîkrîtê wekî "Rêya Mirinê" tê naskirin

Rêya di navbera Kerkûk û Tîkrîtê de ku bi qezayên xwe yên giran tê naskirin, di nav xelkê de wekî "Rêya Mirinê" jî tê binavkirin.

Tenê di nav 3 salên dawî de 160 kesan li ser vê rêyê di qezayan de canê xwe ji dest daye.