Hewlêr (Rûdaw) - Hevseroka Şaredariya Bajarê Mezin a Amedê Serra Bucakê ragihand ku wan projeya tramvayê pêşkêşî Serokkomariyê kir.
Ev projeya bi 200 milyon euroyî dê pirsgirêka çûn û hatina li bajêr çareser bike.
Hevseroka Şaredariya Bajarê Mezin a Amedê Serra Bucak bi Wezîrê Jîngeh, Bajarvanî û Guherîna Avhewayê Murat Kurum û Wezîrê Veguhastin û Binesaziyê Abdulkadir Uraloglu re civiya.
Serra Bucakê hûrgiliyên hevdîtinên xwe yên li Enqereyê parve kirin.
Wê destnîşan kir ku ji bo bicihkirina projeyê rewşa siyasî û dema niha gelekî guncav e.
Astengiya darayî û formûla wezaretê
Li gorî nûçeya ÎHAyê, Bucakê diyar kir ku ji bo xeta 14,1 kîlometreyî ya di navbera Deriyê Çiyê û Nexweşxaneya Perwerde û Lêkolînê de amadehî hatine temamkirin.
Bucakê anî zimên ku di bikaranîna krediya derve de ji bo vagonan şertê ji sedî 60 xwemalîbûnê heye û ev yek pêvajoya bi bankayên navneteweyî re zehmet dike.
Wê wekî çareserî pêşniyar kir ku Wezareta Veguhastin û Binesaziyê projeyê bigire ser xwe.
Di vê modelê de tê pêşbînîkirin ku Wezaret pêk bîne û şaredarî jî bi deyngirtinê projeyê temam bike.
Hilberîna 200 milyon euroyî
Bucakê da zanîn ku lêçûna niha ya projeyê nêzîkî 14 milyar lîreyî (200 milyon euro) ye.
Wê diyar kir ku dê 120 milyon euroyê budceyê ji bo karên binesazî û elektromekanîkî were veqetandin.
Bi gotina wê dê 80 milyon euroyê din jî ji bo 36 vagonan were xerckirin ku dê di du qonaxan de bên kirîn.
Bucakê da zanîn ku ji xeynî pergala trêna sivik, wan kêmasiyên wekî xaçerêyên jîr, jêrderbasok, serderbasok û rêyên hawirdorê jî ji Wezaretê re ragihandine.
Wê destnîşan kir ku ev veberhênan dibin stûna bingehîn a Plana Master a Çûn û Hatinê ya 2040î.
"Rewşa siyasî ji bo hevkariyê guncav e"
Bucakê anî zimên ku pergala trêna sivik ne tenê projeyeke çûn û hatinê ye û bal kişand ser nîqaşên pêvajoya nû ya siyasî û got:
"Eger Serokkomar vê projeyê erê bike û Wezaret bi şaredariya me re hevkariyê bike, ev dê bibe peyameke erênî ji bo xelkê Amedê.
Rewşa siyasî ya niha vê gavê pêkan dike. Ez hêvî dikim ku ev dema girîng heder neçe."
