Hewlêr (Rûdaw) - Li Rojhilatê Kurdistanê meleyekî gef li Kurdên Êzidî xwarin.
Gel û saziyên Başûrê Kurdistanê ji ber vê yekê gelekî aciz bûne û vê zimandirêjiyê qebûl nakin.
Vîdeoyeke meleyekî ji Rojhilatê Kurdistanê belav bû ku tê de gefa tunekirina Kurdên Êzidî dixwe.
Piştî belavbûna vê vîdeoyê, Birêvebirê Giştî yê Kar û Barên Êzidiyan ê Wezareta Ewqaf û Kar û Barên Ayînî ya Herêma Kurdistanê daxuyaniyek da.
Birêvebirê Giştî Siûd Misto xwest ku ji bo rûbirûbûna gotarên nefretê yasayeke taybet were derxistin.
"Destekî derve heye"
Siûd Misto ji Rûdawê re axivî û got:
"Em hest dikin ku destekî derve li pişt wî kesî heye. Armanca wan ew e ku aştiya civakî ya li Herêma Kurdistanê têk bidin."
Siûd Misto diyar kir ku ew wekî civaka Êzidî ne li Îran û ne jî li Rojhilatê Kurdistanê ne û wiha domand:
"Em ne li ser nan û ava hev in. Ji ber vê yekê, destê derve li pişt vê yekê ye da ku bihevrejiyan û aştiya civakî ya li Herêma Kurdistanê têk bide."
Daxwaza yasayeke taybet
Siûd Misto destnîşan kir ku divê yasa sînorekî ji van hewlan re deyne û got:
"Me daxwaz kiriye ku yasayeke taybet a li hemberî gotarên nefretê bê derxistin. Bi taybetî jî li ser medyaya civakî, ji ber ku laşê civaka Êzidî birîndar e.
Ew êdî nikare van hemû gotarên tijî kîn û nefret tehemul bike."
Berê jî bi hevahengiya Bingehê Laleş û Wezareta Ewqafê nexşerêyek ji bo rûbirûbûna gotara dijayetî û nefretê hatibû amadekirin.
Wergirtina tedbîrên pêwîst
Li gorî gotina Birêvebirê Giştî yê Kar û Barên Êzidiyan, Wezîrê Ewqafê û Yekîtiya Zanayên Ayînî bi civaka Êzidî re di nava pêwendiyê de ne.
Ew her tim tekezî li ser parastina bihevrejiyanê dikin.
Her wiha ji bo girtina tedbîrên pêwîst, ev mijar gihîştiye Beşa Îranê ya Fermangeha Pêwendiyên Derve ya Herêma Kurdistanê.
Siûd Misto amaje bi wê yekê jî kir ku ev cure gotar ne tenê li dijî Êzidiyan in û got:
"Ev di heman demê de destdirêjî ye li ser mînber û peyama rastîn a Îslamê. Ev yek zererê digihîne nirxên wê yên pîroz."
Siûd Misto di dawiya axaftina xwe de tekez kir ku parastina aştî û bihevrejiyana civakî erkekî niştimanî ye û li ser milê her kes û saziyekê ye.
