Hewlêr (Rûdaw) - Emîndarê Bexdayê Emar Mûsa di hevpeyvîneke taybet a bi Rûdawê re ragihand ku ezmûna Herêma Kurdistanê ya di warê xizmetguzariyên şaredariyê de "bipêşketî ye".
Emar Mûsa diyar kir ku Bexda dixwaze sûdê ji vê yekê wergire û ezmûnan bi şaredariyên Herêma Kurdistanê re parve bike.
Emîndarê Bexdayê Emar Mûsa wekî endamê şandeya Serokwezîrê Îraqê Elî Falih Zeydî li Parîsê ye.
Emar Mûsa li wê derê bersiv da pirsên Rûdawê.
Wî di bersivên xwe de bal kişand ser girîngiya serdana xwe û pêwendiyên bi Herêma Kurdistanê re.
"Ezmûna Herêma Kurdistanê bipêşketî ye"
Emar Mûsa derbarê pêwendiyên wan ên bi Herêma Kurdistanê re destnîşan kir ku di navbera Emîndariya Bexdayê û şaredariyên Herêma Kurdistanê de hevahengî heye.
Emar Mûsa got, "Ezmûna Herêma Kurdistanê ya di warê xizmetên şaredariyê de ezmûneke pêşketî ye. Em dixwazin sûdê ji van ezmûnan wergirin. Em dixwazin di navbera Bexda û şaredariyên Herêma Kurdistanê de guhertina ezmûnan çêbibe."
Emîndarê Bexdayê her wiha diyar kir, "Di navbera Bexda û Herêma Kurdistanê de hevahengî û pêwendiyeke ku didome heye. Herêma Kurdistanê beşeke Îraqê ye ku jê nayê veqetandin. Em dixwazin ev pêwendî bidomin û bi pêş bikevin. Em dixwazin ev pêwendî bi awayekî ku xizmetê ji birayên me yên Kurd ên li Herêma Kurdistanê û birayên me yên Ereb ên li Bexdayê re bike, bêne xurtkirin."
Serdana Parîsê û hevkariya Fransayê
Emar Mûsa serdana şandeya Îraqê ya ji bo Fransayê wekî serdaneke "girîng" pênase kir. Wî ragihand ku armanca wan "xurtkirina pêwendiyan û îmzekirina peymanên hevbeş ên di hemû sektoran de" ye.
Emîndarê Bexdayê eşkere kir ku ew dê bi komekê ji şirketên Fransî re bicivin ku di warê binesazî û veguhastinê de pispor in. Emar Mûsa got, "Bexda bajarekî mezin e û pêwîstiya wê bi parvekirina ezmûnan heye."
Wî berpirsî amaje bi peymaneke jihevtêgihiştinê kir ku berê di navbera Emîndariya Bexdayê û Şaredariya Parîsê de hatibû îmzekirin. Ev peyman çendîn warên wekî binesazî, giringîdana bi deverên dîrokî, birêvebirina zibil û rûbirûbûna bi pirsgirêkên avhewayê li xwe digire.
Emar Mûsa derbarê qirêjbûna Çemê Dîcleyê de jî qebûl kir ku "Çemê Dîcleyê ji hinek aliyan ve qirêj dibe". Wî got ku Şaredariya Bexdayê ji bo çareserkirina vê pirsgirêkê li ser projeyeke mezin dixebite.
Emar Mûsa anî zimên, "Pisporiya şirketên Fransî ya di vî warî de dê ji bo encamdana projeyên hêjayî Bexdaya paytext amade be."
Naveroka hevpeyvîna Nûçegihana Tora Medyayî ya Rûdawê Ala Şaliyê û Emîndarê Bexdayê Emar Mûsa wiha ye:
Rûdaw: Ev serdana ku Serokwezîrê nû yê Îraqê bi şandeyeke mezin li vê derê ye û îro çend civînên wî yên ku hene çi qasî girîng in?
Emar Mûsa: Bi navê Xwedayê mezin û dilovan, serdana birêz Serokwezîr a ji bo Fransayê serdaneke girîng e. Ev serdan ji bo xurtkirina pêwendiyan û îmzekirina hevkariyên di hemû sektoran de girîng e. Em îro bi şandeya birêz Serokwezîr re ji bo civîna bi komek şirketên Fransayî re li vê derê ne. Ev şirket di warê binesazî û veguhastinê de pispor in.
Berê jî Emîndariya Bexdayê bi hejmarek şirketên Fransayî re kar û girêbest kiribûn. Bexda bajarekî mezin e û pêwîstiya wî bi parvekirina ezmûnan heye. Ev serdan di vê demê de girîng e. Her wiha di dema van hevdîtin û civînên bi van şirketan re, ji bo pêşkêşkirina baştirîn xizmetguzariyê ji bo Bexdaya paytext em dê li ser karên hevbeş li hev bikin.
Rûdaw: Ji bo paqijkirina jîngeha Bexdayê hûn çi qasî sûdê ji şirketên Fransayî û Ewropayî werdigirin?
Emar Mûsa: Bi eşkereyî serdan ji bo xurtkirina pêwendiyên Bexda û Parîsê girîng e. Peymaneke lihevtêgihiştinê heye ku berê di navbera Emîndariya Bexdayê û Şaredariya Parîsê de hatiye îmzekirin. Ev peyman li Bexdayê hat îmzekirin û çendîn warên hevahengiyê li xwe digire.
Yên herî girîng binesazî, giringîdana bi deverên dîrokî, birêvebirina zibil û pirsgirêkên avhewayê ne. Ev hemû dosye di dema vê serdanê de amade ne. Bi îzna Xwedê ev yek dê bandoreke erênî li xizmetguzariyên Bexdaya paytext bike.
Rûdaw: Hûn ji bo paqijkirina ava Dîcleyê çi dikin?
Emar Mûsa: Belê, îro li Bexdayê hinek sedemên qirêjbûna Çemê Dîcleyê hene. Şaredariya Bexdayê hewl dide projeyeke mezin encam bide da ku qirêjbûna ava çêm sînordar bike. Me gelek proje qedandine û ketine xizmetê. Her wiha di çarçoveya planên me de projeyên din jî hene ku em ji bo temamkirina wan dixebitin. Pisporiya şirketên Fransayî ya di vî warî de dê ji bo encamdana projeyên hêjayî Bexdaya paytext bibe alîkar.
Rûdaw: We van demên dawiyê serdana Herêma Kurdistanê kir. Hûn çawa hewl didin sûdê ji ezmûna hevdû wergirin?
Emar Mûsa: Belê, di navbera Emîndariya Bexdayê û şaredariyên Herêma Kurdistanê de pêwendî û hevahengî heye. Yekîtiyeke şaredariyan jî heye ku welatên herêmê li xwe digire û Bexda û şaredariyên Herêma Kurdistanê jî di nav de ne. Ezmûna Herêma Kurdistanê ya di xizmetên şaredariyê de ezmûneke bipêşketî ye. Em dixwazin sûdê ji van ezmûnan wergirin û di navbera Bexda û şaredariyên Herêma Kurdistanê de parvekirina ezmûnan çêbibe.
Rûdaw: Pirsa dawî ji we. Hûn ji bo hêsankirina karê veberhênerên Herêma Kurdistanê çi dikin da ku li Bexdayê veberhênanê bikin?
Emar Mûsa: Bi eşkereyî ez behsa aliyê xizmetguzariyê yê pêwendiya di navbera Bexda û Hewlêrê de dikim, ne aliyên din. Di navbera Bexda û Herêma Kurdistanê de hevahengî û pêwendiyeke ku didome heye. Herêma Kurdistanê beşeke Îraqê ye ku jê nayê veqetandin. Em dixwazin ev pêwendî bidomin û bi pêş bikevin. Em hewl didin ev kar bi awayekî ku xizmetê ji birayên me yên Kurd ên li Herêma Kurdistanê û birayên me yên Ereb ên li Bexdayê re bike, bimeşin.
