Hewlêr (Rûdaw) - Supaya Pasdarên Îranê ragihand ku wan droneke Amerîkayê ya ji cureyê MQ-9 li rojhilatê Tengava Hurmizê xistiye.
Îranê her wiha eşkere kir ku wan êrişên tolhildanê yên berfireh li ser baregehên leşkerî yên herêmê pêk anîne.
Supaya Pasdaran a Îranê bi daxuyaniyekê eşkeer kir ku drona MQ-9 ji aliyê pergaleke parastina asmanî ya nû û bipêşketî ya Hêzên Hewayî yên Pasdaran ve hatiye tesbîtkirin û xistin.
Hat diyarkirin ku operasyon "di hevahengiya tora parastina asmanî ya yekbûyî ya Îranê de" pêk hatiye.
Pasdaran destpêka rojê jî ragihandibû ku wan droneke din a Amerîkayê li Tengava Hurmizê xistiye û ketiye nav avên Kendavê.
Bi mûşek û dronan êrişî baregehên herêmê kirin
Li aliyê din, Supaya Pasdaran eşkere kir ku wan bi mûşekên balîstîk baregehên asmanî yên li Urdinê kirine armanc.
Her wiha hat diyarkirin ku wan bi dronên bombebarkirî êrişî Baregeha Asmanî ya Mînhadê ya li Îmaratê kiriye.
Aliyê Îranê ragihand ku ev operasyonên hevdem û berfireh wekî tolhildana êrişa roja yekşemê ya Amerîkayê ya li ser Girava Larkê hatine kirin.
Hatibû ragihandin ku operasyona Amerîkayê ji bo rêlibergirtina danîna mayînan a li Tengava Hurmizê hatiye kirin.
Tengava Hurmizê rêyeke stratejîk a veguhastina petrolê ye.
Tê pêşbînîkirin ku aloziya li herêmê bandorê li bazarên enerjiyê û xetên veguhastinê bike.
