Hewlêr (Rûdaw) - Çarşemê di dema girtina bazarên cîhanê de, bihayê zîv zererên xwe qerebû kirin û bi 71,94 dolaran hat firotin.
Bi vî awayî, kîloyeke zîv 2 hezar û 312 dolaran tê firotin.
Berê zîv çar rojên li pey hev bilindbûn tomar kiribû û doh gihîştibû 72,46 dolaran ku ev asta herî bilind a dîrokî ye di dan û standinan de hatiye tomarkirin.
Bihabûna zîv di demekê de ye ku veberhêner li benda kêmkirina rêjeya faîzê ya Banka Navendî ya Amerîkayê ne.
Pêşbîniyên li ser faîzê û aboriyê
Niha tê pêşbînîkirin ku bank sala bê du caran rêjeya faîzê kêm bike.
Her çiqas geşbûna Hilberîna Navxweyî ya Gross (GDP) a Amerîkayê di çaryeka sêyem de ji sedî 4,3 bûbe jî, daketina baweriya bikarhinêran û arambûna asta hilberîna kargehan a çiriya paşîn, ew nêrîn li cem pisporan çêkiriye ku di mehên bê de siyaseta diravî ya Amerîkayê ber bi hêsankirin û kêmkirina faîzê ve biçe.
Bandora Trump û aloziyên jeopolîtîk
Her wiha alozî û girjiyên jeopolîtîk jî sedemeke din a bilindbûna bihayên zîv in.
Serokê Amerîkayê Donald Trump hefteya bê fermana dorpêçkirina wan tankerên petrolê yên Venezuelayê da ku ceza li ser wan hene.
Vê yekê bandor li bazaran kir û wiha kir ku daxwaza li ser zîv wekî "penageheke aram" a veberhênanê zêde bibe.
Ji destpêka îsal ve heta niha, bihayê zîv nêzîkî ji sedî 150 bilind bûye.
