Hewlêr (Rûdaw) - Banka Navendî ya Amerîkayê (Fed) ji Tîrmeha 2023yan ve cara ewil faîz zêde kir.
Fedê li gorî pêşbîniyan rêjeya faîza xwe 25 puanan bilind kir û derxist asta ji sedî 3,75-4an.
Di daxuyaniya Fedê de hat eşkerekirin ku biryara bilindkirina faîzê bi yekdengî hatiye wergirtin.
Li gorî daxuyaniyê, Komîteya Bazara Azad a Federal (FOMC) ji bo piştgirîkirina erkê xwe yê dualî biryar daye ku rêjeya faîzê 25 puanan bilind bike û derxe asta ji sedî 3,75-4an.
Rewşa aborî û amarên nû
Di daxuyaniyê de hat destnîşankirin ku çalakiya aborî bi lezeke xurt berfireh dibe.
Tevî ku ji ber rûdanên jeopolîtîk nediyarî di astên bilind de didome jî xerciyên navxweyî xurt in.
Her wiha hat diyarkirin ku zêdebûna berhemdariyê bihêz e û veberhênanên sermayeyê jî li ser pêyan in.
Zêdebûna derfetên kar bi qasî zêdebûna hêza kar e û di rêjeya bêkariyê de jî guherîneke berbiçav çênebûye.
Fedê di daxuyaniyê de balê kişand ser wê yekê ku enflasyon hîn jî bilind e û hat gotin:
"Gava polîtîk a îro dê piştgiriyê bide vegera di wextê xwe de ya ji bo armanca ji sedî 2yan a Komîteyê. Komîte dê aramiya bihayan dabîn bike."
Fedê herî dawî sala 2023yan faîz zêde kiribû
Fedê par di mehên îlon, çiriya pêşîn û kanûna pêşîn de rêjeya faîzê bi giştî 75 puanan kêm kiribû.
Piştre di 5 civînên pêşîn ên îsal de rêjeya faîzê neguherandibû û sabît hiştibû.
Amarên dawî yên li Amerîkayê nîşan didan ku bazara kar bihêz e lê belê enflasyon hîn jî li ser armanca diyarkirî ye.
Van amaran pêşbîniyên zêdekirina faîzê xurtir kiribûn.
Ji ber vê yekê li bazarên diravî dihat çaverêkirin ku Fed di civîna meha Îlonê de rêjeya faîzê 25 puanan bilind bike.
Banka Navendî ya Amerîkayê herî dawî Tîrmeha 2023yan ji bo têkoşîna li dijî enflasyona bilind faîz 25 puanan zêde kiribû û derxistibû asta ji sedî 5,25-5,50yî.
.webp&w=3840&q=75)
