Hewlêr (Rûdaw) - Şirketa DNOyê ya Norwecê ragihand ku wan li qada Tawgê ya Zaxoyê careke din dest bi hilberîna petrolê kiriye.
Lê amarên hilberîna petrolê yên şirketê yên di çaryeka duyem a îsal de daketineke mezin nîşan didin.
Ev daketin jî ji ber rawestandina hilberîna petrolê ya demeke dirêj e.
Li gorî daxuyaniyê, 9ê Nîsana 2026an karên meydanî dîsa dest pê kiriye û dest bi kolîna 8 bîrên petrolê hatiye kirin.
Piştî van karan, li qada Tawgê 28ê Hezîranê û li qada Pêşabûrê jî 11ê Tîrmehê kar dîsa dest pê kiriye.
Di amaran de daketineke mezin heye
Xebatên hilberîna petrolê dest pê kiriye lê amar nîşan didin ku hilberîna petrolê gelekî kêm e.
Navîniya hilberîna petrolê ya şirketê di çaryeka duyem a îsal de rojê tenê 273 bermîl bûye.
Ev rêje li gorî çaryeka yekem ji sedî 99,9 daketiye.
Di çaryeka yekem a sala 2026an de rojane 39 hezar û 600 bermîl petrol dihat hilberîn.
Ev rêje ji hilberîna çaryeka duyem a sala 2025an gelekî kêmtir e ku wê demê rojê 56 hezar û 70 bermîl petrol dihat hilberîn.
Firotina petrolê bûye sifir
Her wiha qebareya firotina petrolê ya li Herêma Kurdistanê di çaryeka duyem de bûye sifir.
Lê di çaryeka yekem a îsal de rojane 14 hezar û 753 bermîl petrol hatibû firotin.
Birêvebiriya şirketê ragihand ku her hewleke ji bo zêdekirina bilez a hilberînê ya di paşerojê de girêdayî sê mercên sereke ye.
Ev merc jî ev in:
· Silametî û şiyana teknîk a binesaziya qadan a ku demeke dirêj asê mabû.
· Parastina ewlehiya herêmê.
· Rêkxistina kar û barên lojîstîk ên ji bo hinartinê.
.webp&w=3840&q=75)
