Hewlêr (Rûdaw) - Derhênerê belgefîlma "DAIŞê Ez Bi Tenê Hiştim" Salar Reza got, "Belgefîlma me di Fêstîvala Onirosê de xelata belgefîlm û çîroka herî baş bi dest xist û em li bendê ne ku di çend fêstîvalên din de jî xelatan bibe."
Belgefîlma derhênerê Kurd Salar Reza "DAIŞê Ez Bi Tenê Hiştim" di Festîvala Fîlman a Onirosê ya bi prestîj a li bajarê New Yorkê de serkeftinek mezin bi dest xist.
Belgefîlmê di festîvalê de hem xelatên "Belgefîlma Herî Baş" û hem jî "Çîroka Herî Baş" wergirt.
Derbarê Kurd Salar Reza li ser Fêstîvala Onirosê ji Rûdawê re axivî û ev agahî dan:
"Fêstîvala Onirosê yek ji 100 fêstîvalên girîng ên navneteweyî yên cîhanê ye ku li New Yorkê tê lidarxistin.
Ev pêşbirk mehane tê kirin û ji aliyê Danegira Fîlman a Înternetê (IMDb) ve bi awayekî fermî hatiye naskirin.
Armanca wê dîtin û piştgirîkirina derhênerên jêhatî û berhemên sînemayê yên bêhempa yên li seranserê cîhanê ye.
Her 3 mehan carekê fîlmên serkeftî di merasîmeke taybet de li bajarê New Yorkê tên nîşandan."
Salar Reza diyar kir, "14ê Îlona 2026an belgefîlm dê di merasîmeke taybet de li bajarê New Yorkê yê Amerîkayê were nîşandan."
Çîroka fîlmê
Belgefîlm çîroka keçeke Kurd a 14 salî ya ji Silêmaniyê vedibêje ku xewna wê ew e bibe bijîşk.
Dema ku malbata wê keçikê ji bo tedawiya dayîka wê diçin Tirkiyeyê, geşta wan rastî qonaxeke trajîk tê û ew dikevin wan deverên ku di bin kontrola DAIŞê de ne.
Nasandina doza Kurdan
Salar Reza destnîşan kir ku armanca berhemên Rûdawê nasandina doza Kurdan û pirsgirêk û destkeftiyên neteweyê ye û got:
"Niha bi saya Rûdawê navên Pêşmerge û şervanan gihiştine ser xalîçeya sor a fêstîvalên cîhanî.
Berê ji ber nebûna medyayê, nedibû ku kesayetiyên niştimanperwer bi cîhanê werin nasandin lê niha Rûdaw bûye sedem ku Kurd zêdetir werin naskirin."
Salar Reza her wiha got, "Encamên karên me wisa dikin ku em zêdetir hewl bidin û qet hizir li westîbûnê nekin.
Niha em pê kêfxweş in ku berhemên me li cîhanê tên naskirin.
Karê me ew e ku em wan dosyeyên girêdayî gelê xwe bi cîhanê bidin nasîn, bi taybetî jî di warên Enfal û kîmyabarankirinê de."
Keda tîmeke pispor
Salar Reza derbarê astengiyên li pêşiya çêkirina belgefîlmê diyar kir, "Dîtina çîrokê yek ji astengiyên mezin bû û me bi alîkariya Dezgeha Asayîşê dosyeyeke taybet dît."
Salar Reza li ser xebata belgefîlmê jî anî zimên ku tîmeke pispor bi hev re ji bo çêkirina fîlmê kar kiriye.
Hîn dema nîşandana fîlmê ya li Kurdistanê nehatiye diyarkirin lê di du fêstîvalên din de jî hatiye nasandin.
Salar Reza Seîd rojnamegerekî Kurd e û zêdetirî 20 salan ezmûna wî di vî warî de heye.
Salar ji sala 2012an ve li Tora Medyayî ya Rûdawê dest bi kar kiriye û niha birêvebirê ofîsa Silêmaniyê ya Tora Medyayî ya Rûdawê ye.
