Hewlêr (Rûdaw) - Li Stenbolê kirêya xaniyan erzan bûye û firotina wan kêm bûye.
Li Stenbolê demsala havînê ye, geştyar kêm in û xwendekarên zanîngehan jî ji ber betlaneya havînê berê xwe daye bajarên xwe.
Ji ber kêmbûna hejmara geştiyaran û çûna xwendekarên zanîngehan, li Stenbolê kirêya xaniyan erzan bûye.
Emlakfiroş Cengiz Şahîn diyar kir ku di van rojan de kirêya xaniyan hinekî daketiye û got:
“Bijardeyên xaniyan û alternatîv zêde bûne. Ji ber havîn e, xwendekar vegeriyane bajarên xwe, wextê kirêkirin û barkirinê ye.
Dema em van hemûyan didin ber hev alternatîv piçekî zêde bûne. Helbet bi hatina geştiyaran re kirêkirinên rojane û air BNB jî kêm bûne û niha alternatîv zêdetir in û kirê jî piçekî erzan bûye.”
Li Stenbolê xaniyê herî erzan bi 5 milyon lîreyan e ku dike nêzîkî 185 hezar dolar.
Emlakfroş dibêjin, karmendên mûçeyê herî zêde werdigrin jî nikarin xaniyekî bikirin.
"Em bifiroşin kê?"
Şêwirmendê Weberhênanê Yalçin Bayezitlioglu jî got:
“Dema em dinêrin geştyarî jî bi taybetî li Stenbolê kêm e. Jixwe bi van bihayan firotin ne pêkan e.
Bihayê xaniyekî ji 5 milyon lîreyan dest pê dike û heta 15 milyon lîreyan diçe. Bi vî bihayî kirîn ne pêkan e.
Em bifiroşin kê? Burokrat, misteşar û karmendên herî baş jî nikarin pereyekî wiha kom bikin daku ji xwe re xaniyekî bikirin.”
Stenbol ji aliyê hejmara niştecihan ve bajarê herî mezin ê Tirkiyeyê ye.
Li gorî amarên fermî, li Stenbolê 15 milyon û 907 hezar û 951 kes dijîn.
Ev rêje dike ji sedî 18,65ê hemû welatiyên Tirkiye û Bakurê Kurdistanê.
Li parêzgehê nêzîkî 4 milyon û 500 hezar avahî hene.
