Hewlêr (Rûdaw) - APIKURê ragihand ku ew amade ne dîsa petrolê ji Herêma Kurdistanê re bişînin Tirkiyeyê lê ev yek tenê bi mercê ku peyman û destûrên kar tê de werin berçavgirtin, dikare pêk were.
Komeleya Pîşesaziya Petrolê ya Kurdistanê (APIKUR) li ser platforma medyaya civakî ya Xê derbarê dan û standinên di navbera Herêma Kurdistanê û hikûmeta Îraqê de daxuyaniyek da.
APIKUR di daxuyaniya xwe de got, "Wekî ku me berê jî gelek caran diyar kiriye, şirketên endamên APIKURê piştî ku li ser şertên heyî lihevkirin çêbibe, em amade ne ku dîsa bi rêya boriya Îraq-Tirkiyeyê petrolê bişînin derve.”
“Em peymaneke nivîskî dixwazin”
APIKUR da zanîn ku ew "bi hikûmeta Îraqê û Hikûmeta Herêma Kurdistanê re li pey peymaneke nivîskî ya firotinê ne ku bêyî destêwerdana siyasî û bi şefafî garantiya dayînê bide."
Wezareta Petrolê ya Îraqê doh ragihand ku prosedurên pêwîst ên ji bo destpêkirina dîsa şandina petrola Herêma Kurdistanê ya bi rêya Bendera Ceyhanê temam bûne.
Wezaretê ji rayedarên Herêma Kurdistanê xwest ku ji bo destpêkirina dîsa şandinê, hilberîna qadên çalak bişînin Şirketa Firotina Petrolê ya Îraqê (SOMO).
Di beşeke din a daxuyaniya APIKURê de wiha hat gotin:
"Şirketên endamên APIKURê li ser xebata bi hemû aliyên pêwendîdar re ji bo gihiştina çareseriyeke ku dê ji bo her kesî bi feyde be baldar in.
Em piştgiriyê didin daxuyaniya dawî ya Serokwezîr Sûdanî ya 22ê Sibatê ku got destpêkirina hinartina petrolê dê aboriya Îraqê xurt bike û dê hemû pêdiviyên welatiyan dabîn bike."
Ji Adara 2023yan û vir ve, şandina rojane ya 400 hezar bermîl petrolê ya Herêma Kurdistanê û 75 hezar bermîl petrolê ya Kerkûkê bi rêya boriyê hat rawestandin.
Ev yek piştî biryara dadgeha navbeykariyê ya navneteweyî ya Parîsê pêk hat.
Dadgehê ragihand ku Tirkiyeyê ji ber ku ji 2014an û vir ve, ji ber ku bêyî erêkirina Bexdayê destûr daye firotina serbixwe ya petrolê ya Herêma Kurdistanê, peymana 1973yan binpê kiriye.
Berdevkê APIKURê Miles Caggins ji Rûdawê re destpêka îsal ragihandibû ku zerera rawestandina hinartina petrolê ya Herêma Kurdistanê ya bi rêya boriya Îraq-Tirkiyeyê gihiştiye 23-24 milyar dolaran.
