رووداو دیجیتاڵ
یانەی بارسێلۆنا بردنەوەیەکی گەورە و مێژوویی بەرامبەر یانەی ریال مەدرید تۆمارکرد و نازناوی جامی سوپەری ئیسپانیای بەدەستهێنا.
یاریی کۆتایی جامی سوپەری ئیسپانیا، لە سعودیە لەنێوان هەردوو یانە بەڕێوەچوو، بارسێلۆنا سەرەتا گۆڵی لێکرا، بەڵام وەڵامێکی زۆر بەهێزی ریال مەدریدی دایە و نازناوەکەی بۆ جاری پازدەیەم لە مێژوویدا بەدەستهێنا.
لە خولەکی 5 کیلیان ئێمباپێ یەکەم گۆڵی خۆی لە کلاسیکۆدا تۆمارکرد و ریال مەدریدی پێشخست، بەڵام زۆری نەبرد لامین یامال بە جوانترین شێوە ئەنجامەکەی یەکسانکردەوە.
لە خولەکی 36 رۆبێرت لیڤاندۆڤسکی بەلێدانی سزا بارسێلۆنای کردە خاوەنی دوو گۆڵ و یانەکەی پێشخست.
دوای سێ خولەک، رافینیا بەلێدانی سەر بۆ جاری سێیەم تۆڕی تیبۆ کۆرتوای هەژاند، بەر لە کۆتاییهاتنی نیوەی یەکەمیش، ئەلیخاندرۆ بالدێ، گۆڵی چوارەمی تۆمارکرد و ریال مەدریدی بەتەواوی خستە نێو دۆخێکی خراپ.
لە سەرەتای نیوەی دووەمدا، رافینیا گۆڵی دووەمی خۆی و پێنجەمی بارسای تۆمارکرد، یانەکەی زیاتر لە بردنەوەیەکی مێژوویی و گەورە نزیککردەوە.
خولەکی 56 ڤۆیچیچ چیزنی، گۆڵپارێزی بارسێلۆنا بە کارتی سوور لە یارییەکەدا کرایە دەرەوە، دوای ئەوە لە خولەکی 60 رۆدریگۆ بە لێدانێکی راستەوخۆ ئەنجامەکەی کەمکردەوە.
بارسێلۆنا زیاتر لە 30 خولەک بە 10 یاریزانەوە یارییکرد، بەڵام ریال مەدرید هیچی پێنەکرا و یارییەکە بە 5 گۆڵ بەرامبەر 2 گۆڵ لە بەرژەوەندی بارسا کۆتاییهات، بلاوگرانا بووە پاڵەوانی جامی سوپەری ئیسپانیا و بۆ جاری پازدەیەم نازناوەکەی بردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ