رووداو دیجیتاڵ
بە سەرکردایەتی کریستیانۆ رۆناڵدۆ، لە جامی شای سعودیە یانەی نەسڕ بە ئەنجامی 5-2 لە یانەی شەبابی بردەوە و بۆ قۆناخی پێش کۆتایی پاڵەوانێتییەکە سەرکەوت.
شەباب بەبەهێزی دەستی پێکرد و لە خولەکی 15ـی یارییەکەدا لێدانێکی سزایان بۆ هەژمارکرا، بەڵام یانیك کاراسکۆ لێدانەکەی بۆ دەرەوەبوو و نەیتوانی یانەکەی پێشبخات.
دوای ئەو رووداوە، نەسڕ گەڕایەوە یارییەکە و لە خولەکی 17 سێکۆ فۆفانا گۆڵی یەکەمی نەسڕی تۆمارکرد.
دواتر شەباب دەستی بە هێرشەکانی کردەوە و لە خولەکی 24 کارلۆس گۆڵی یەکسانبوونی بۆ یانەکەی تۆمارکرد و یارییەکەی گەڕاندەوە خاڵی سەرەتا.
تەنیا چوار خولەك دوای گۆڵەکەی شەباب، نەسڕ لە رێگەی سادیۆ مانێ گۆڵی دووەمی تۆمارکرد و جارێکی دیکە پێشکەوت.
نەسڕ بەو ئەنجامە رازی نەبوو و بەردەوامبوو لە هێرشەکانی، لە خولەکی زیادکراوی نیوەی یەکەمدا عەبدولرەحمان غەریب گۆڵی سێیەمی تۆمارکرد و جیاوازییەکەی زیاترکرد.
ئەوەی هەمووان بەدرێژایی یارییەکە چاوەڕێی بوون لە خولەکی 74 روویدا، کریستیانۆ رۆناڵدۆ توانی گۆڵی چوارەم بۆ نەسڕ تۆماربکات و دڵنیایی بداتە هاندەرانی ئەو یانەیە.
هەرچەندە لە خولەکی 90 هاتان باهەبری گۆڵی دووەمی بۆ شەباب تۆمارکرد و جیاوازییەکەی کەمکردەوە، هەرزوو محەمەد ماران گۆڵی پێنجەمی نەسڕی تۆمارکرد و کۆتایی بە یارییەکە هێنا.
بەم بردنەوەیە یانەی نەسڕ بۆ یاری پێش کۆتایی جامی شای سعودیە سەرکەوت و لەو قۆناخەدا رووبەڕووی یەکێك لە یانەکانی هیلال، خەلیج یان براوەی یاریی نێوان ئیتیحاد و فەیسەڵی دەبێتەوە.
