رووداو دیجیتاڵ
مانچێستەر سیتی پێش دەرچوونی بڕیاری تاوانبارکردنی لە دۆسیەی 115 پێشێلکارییە داراییەکە، هەوڵی ئەنجامدانی دانوستاندنی نهێنی داوە لەگەڵ دەستەی پرێمەرلیگ بۆ گەیشتن بە رێککەوتن، بەڵام گفتوگۆکان شکستیانهێناوە و یانەکە رووبەڕووی سزای وەرزشیی بێپێشینە بووەتەوە.
بەپێی راپۆرتەکان، مانچێستەر سیتی بە نهێنی چووەتە نێو دانوستاندنی سەرەتایی لەگەڵ پرێمەرلیگ بە مەبەستی گەیشتن بە چارەسەرێکی دارایی، بەڵام ئەم وتووێژە نهێنییانە شکستیانهێنا چونکە سیتی ئامادەنەبوو دەستبەرداری جەختکردنەوە لە بێتاوانیی خۆی بێت. ئەگەر رێککەوتنەکە سەریشیبگرتایە، یانەکە بە پێدانی پێبژاردنێکی دارایی گەورەی وەک دابەزین بۆ خولی پلە یەک یان وەرگرتنەوەی نازناوە مێژووییەکانی رزگاری دەبوو، بەبێ ئەوەی بە فەرمی دان بە تاوانەکەیدا بنێت، لە کاتێکدا ئەم جۆرە رێککەوتنە لەلایەن رکابەرە سەرەکییەکانی وەک ئارسیناڵ، لیڤەرپوول و مانچێستەر یونایتدەوە بە تووندی دژایەتی دەکرا کە لە سەردەمی باڵادەستیی سیتی لە بردنەوەی نازناوەکان بێبەش کرابوون.
ئەو پێشێلکارییە داراییانەی لەلایەن لیژنە سەربەخۆکەوە ئاشکراکراون قەبارەیەکی بێوێنەیان هەیە؛ دەستەکە گەیشتووەتە ئەو دەرئەنجامەی کە مانچێستەر سیتی لە ماوەی نۆ وەرزدا لەنێوان ساڵانی 2009 بۆ 2018، پلانێکی ئاڵۆزی بە بەهای نزیکەی یەک ملیار پاوەند جێبەجێکردووە تاوەکو بە شێوازێکی سیستماتیک یاساکانی پرێمەرلیگ و فیدراسیۆنی تۆپی پێی ئەورووپا (یوفا) بۆ جێگیریی دارایی ببەزێنێت. لە ناوەرۆکی بڕیارەکەدا هاتووە کە کۆمپانیاکانی شاری ئەبووزەبی تەنیا بەشێکی کەمی پارەی سپۆنسەریی راگەیێنراویان داوە و بڕەکەی دیکە لەلایەن کۆمپانیای ئەبووزەبی یونایتدەوە دراوە کە خاوەندارییەتییەکەی بۆ شێخ مەنسوور دەگەڕێتەوە. لە رێگەی ئەم فێڵەوە، داهاتی بازرگانیی یانەکە بە زیاتر لە 830 ملیۆن پاوەند بە شێوەیەکی دەستکرد بەرزکراوەتەوە، هەروەها داهاتی مافی وێنەی یاریزانان بە نزیکەی 74 ملیۆن پاوەند زیادکراوە و هاوکات نزیکەی 17 ملیۆن پاوەندی پابەندییەکانی گرێبەستی کارمەندانیش بە شاراوەیی ماوەتەوە.
ریچارد ماستەرز، بەڕێوەبەری جێبەجێکاری پرێمەرلیگ ئەم دۆسیەیەی بە "گرنگترین و گەورەترین دۆسیە لە مێژووی پرێمەرلیگ" وەسفکرد، لە کاتێکدا فێران سۆریانۆ، بەڕێوەبەری جێبەجێکاری مانچێستەر سیتی بە کارمەندانی یانەکەی راگەیاندووە کە لیژنە سەربەخۆکە باوەڕیان بە تیۆری پیلانگێڕی هێناوە کە خولەکە دروستی کردووە.
سەرەڕای سەلماندنی تۆمەتەکان، یانەی مانچێستەر سیتی لە 1ـی مانگی 10ـی 2026 بە فەرمی تانەی لە بڕیارەکەدا و لە راگەیەنراوێکی فەرمیدا جەختی لەوە کردەوە "هەڵوێستی نەگۆڕی یانەکە ئەوەیە کە بڕیارەکە لە چەندین لایەنەوە هەڵەی گەورەی یاسایی، پرەنسیپی و واقیعی لەخۆدەگرێت، یانەکە لە هەموو تۆمەتەکانی پرێمەرلیگ بێتاوانە و بەڵگەی حاشاهەڵنەگر هەن بۆ سەلماندنی ئەم هەڵوێستە". لە ئێستاشدا یانەکە چاوەڕوانی ئەنجامی کۆتایی تانەکەیەتی کە دەتوانێت چارەنووسی مێژوویی پاڵەوانی ئینگلتەرا یەکلایی بکاتەوە.
