رووداو دیجیتاڵ
مایکل ئۆلیسێ، ئەستێرەی فەرەنسی، کە یەکێک بوو لە سوپرایزە گەورەکانی باڤارییەکان لە ساڵی رابردوودا، دەستبەرداری بیرۆکەی پەیوەندیکردن بە ریال مەدرید نەبووە، سەرەڕای دانوستاندەکان بۆ نوێکردنەوەی گرێبەستەکەی لەگەڵ تیپی بایرن میونشنی ئەڵمانی.
ریال مەدرید بەدرێژایی هاوین لە نزیکەوە چاودێری مایکل ئۆلیسێی دەکرد، چونکە یەکێکە لە ئەستێرە دڵخوازەکانی فلۆرێنتینۆ پێرێز، بەڵام سەرۆکی یانەکە نەیویست پەیوەندییەکانی لەگەڵ بایرن میونشن تێکبدات، کە هەوڵ دەدات مانەوەی یەکێک لە دیارترین ئەستێرەکانی ئێستای مسۆگەر بکات بەدرێژکردنەوەی گرێبەستەکەی و کردنی بە خاوەن بەرزترین مووچە لە تیپەکەدا.
بەگوێرەی رۆژنامەی لیکیپ، بایرن میونشن هەوڵ دەدات گرێبەستی ئۆلیسێ نوێ بکاتەوە بۆ مسۆگەرکردنی بەردەوامبوونی بۆ ماوەیەکی درێژ، دوای ئەوەی لە وەرزی رابردوودا یەکێک بوو لە سوپرایزە هەرە دیارەکانی تیپەکەی ڤینسێنت کۆمپانی. ئەم یاریزانە نێودەوڵەتییە فەرەنسییە 52 یاری فەرمی ئەنجام دا، تێیدا 22 گۆڵی تۆمارکرد و 31 گۆڵیشی دروستکرد.
ستراتیژی بایرن میونشن لە یاریگای ئەلیانز ئارێنا بریتییە لە چەسپاندنی پێگەی ئۆلیسێ وەک یاریزانێکی سەرەکی لە پێکهاتەکەدا؛ دوای ئەوەی وەرزی رابردوو نازناوی خول و جامیان بەدەستهێنا، ئەم وەرزە ئاواتیان کێبڕکێکردنە لەسەر نازناوی خولی یانە پاڵەوانەکانی ئەورووپا.
ئۆلیسێ مەرجێک بۆ نوێکردنەوەی گرێبەستەکەی دادەنێت بەهۆی ئەگەری گەڕانەوەی ریال مەدرید بۆ گواستنەوەی ئەم باڵە تەمەن 24 ساڵانە، بایرن میونشن دەیەوێت کۆتایی بەو دەنگۆیانە بهێنێت کە دەوری داهاتووی یاریزانەکەیان داوە. گرێبەستی ئێستای ئۆلیسێ لە ساڵی 2009 کۆتایی دێت و یانە ئەڵمانییەکە بەنیازی درێژکردنەوەیەتی بۆ ماوەی لانیکەم دوو ساڵی دیکە.
ئۆلیسێ یەکێک بوو لە یاریزانە هەرە دیارەکانی مۆندیال، هەرچەندە هیچ گۆڵێکی تۆمار نەکرد، بەڵام 7 گۆڵی دروستکرد، کە ئەمە ژمارەیەکی پێوانەییە و پێشتر لە مێژووی پاڵەوانێتییەکانی فیفادا تۆمار نەکراوە. یاریزانە فەرەنسییەکە ژمارە پێوانەییەکەی پێلێی تێپەڕاند کە 6 ئاسیست بوو لە مۆندیالی 1970ـی مەکسیکدا. ئەم ژمارە پێوانەییە بۆ ماوەی زیاتر لە چوار دەیە مابووەوە، ئەمەش ئاستی بەرزی ئێستای ئۆلیسێ نیشان دەدات.
بایرن پێداگری لەسەر ئەوە کردووە کە دەستبەرداری ئۆلیسێ نابێت تەنانەت بەرامبەر 500 ملیۆن یۆرۆش، سەرەڕای گرنگیپێدانی ریال مەدرید بە یاریزانەکە. ئۆلیسێ خۆی نەیویستووە گوشار بخاتە سەر یانەکەی بۆ جێهێشتنی ئەلیانز ئارێنا، بەڵام دەگووترێت بە کەسە نزیکەکانی راگەیاندووە کە ئارەزووی پەیوەندیکردن بە ریال مەدریدی هەیە.
رۆژنامەکە ئاماژەی بەوە کردووە کە ئۆلیسێ پێداگری کردووە لەسەر دانانی مەرجی هەڵوەشاندنەوەی گرێبەست بەبڕێکی دادپەروەرانە، کە لەڕێگەی ئەو مەرجەوە لە داهاتوودا بتوانێت خەونەکەی بۆ پەیوەندیکردن بە ریال مەدرید بەدیبهێنێت.
.jpg&w=3840&q=75)
