رووداو دیجیتاڵ
لە بووڵتەنی وەرزشدا کە رۆژانە کاژێر 13:30 لەلایەن سامان وڵاتژێرییەوە پێشکێشدەکرێت، گرنگی بە دەستپێکردنی وەرزی نوێی خولی ئەستێرەکانی عێراق یاریی یانە کوردستانییەکان درا.
تایبەت بە یانەی هەولێر، دوایین زانیاری لەبارەی هەوڵەکانی یانەکە بۆ گواستنەوەی عەلی جاسم خرایەڕوو، لەکاتێکدا یانەکە نووسراوێکی فەرمیی بۆ یانەی کۆمۆی ئیتاڵی ناردووە بۆ دەستبەرداربوون لە یاریزانە عێراقییەکە و گرێبەستی ئەو یاریزانە تەنیا لەسەر رازیبوونی یانەکەی ماوە.
دوای ئەوە باس لە رێوڕەسمی دەستپێکردنی خولی ئەستێرەکانی عێراق کرا کە لە یاریگای نەورۆز بەڕێوەچوو و کەرنەڤاڵێکی سەرنجڕاکێشی پێشانی هەموو عێراق دا و کەرنەڤاڵەکە کاردانەوەی گەورەی بەدوای خۆیدا هێنا.
یانەی نەورۆز یەکەم یاریی لە وەرزی نوێدا ئەنجامدا و لە یاریگای خۆی بە سێ گۆڵ بۆ هەرلایەک لەگەڵ یانەی جەوییە یەکسانبوو.
لە بەشێکی دیکەی بووڵتەنەکەدا باس لە یاریی نێوان هەردوو یانەی زاخۆ و گازی باکوور کرا، کە ئەمڕۆ کاژێر 18:30 یەکەم یارییان لە وەرزی نوێدا ئەنجامدەدەن.
لێدوانی هاڕوون ئەحمەد، ئەستێرەی یانەی زاخۆ لەبارەی یارییەکە و دوایین ئامادەکارییەکانی هەردوو یانەکە بۆ یەکەم دەرکەوتنیان خرانەڕوو.