رووداو - دیجیتاڵ
یانەی بارسێلۆنای ئیسپانی هۆشدارییەکی تووند و راشکاوانە ئاراستەی فێران تۆرێس، هێرشبەری یانەکەی دەکات و رایدەگەیەنێت کە بەهیچ شێوەیەک ئامادەنین بچنە نێو کێبڕکێی دارایی و زیادکردنی مووچە بۆ مانەوەی، سەرەڕای ئەوەی یانەی پاریس سانجێرمان چاوی
بڕیوەتە تواناکانی.
سیاسەتێکی نەگۆڕ و گرێبەستێکی نوێ رۆژنامەی سپۆرتی کەتەلۆنی بڵاویکردەوە، بارسێلۆنا لە مانگی ئەیلوولی داهاتوو دەستەوارەیەکی نوێ بۆ نوێکردنەوەی گرێبەستی فێران تۆرێس پێشکەش دەکات، بەڵام بەو مەرجەی مووچەکەی لە چوارچێوەی سیاسەتی نوێی
مووچەی یانەکەدا بێت. بلاوگرانا هیچ نیازی نییە دەستەوارەکەی باشتر بکات، تەنانەت ئەگەر یاریزانەکە لە یانەکانی دیکەوە گرێبەستی گرانبەهاشی بۆ بێت.
کەس دەستلێنەدراو نییە
هانز فلیک، راهێنەری نوێی بارسێلۆنا، فێران تۆرێس بە یاریزانێکی گونجاو بۆ پڕۆژەکەی دەبینێت، بەتایبەت کە دەتوانێت لە چەندین شوێنی جیاوازی هێرشبەریدا یاری بکات. سەرەڕای ئەوەی فێران لە ژووری جلگۆڕیندا خۆشەویستە و وەرزێکی باشی بەڕێکرد، بەڵام کارگێڕی بارسێلۆنا پەیامێکی روونیان هەیە "هیچ یاریزانێک نییە کە نەتوانین دەستبەرداری ببین".
مەرجەکانی فرۆشتن
بارسێلۆنا بڕیاری داوە ئەگەر فێران بڕیاری رۆیشتن بدات، بارسێلۆنا رێگری لێ ناکات، بەڵام بە مەرجێک داوای کەمتر لە 55 ملیۆن یۆرۆ ناکات، کەهەمان ئەو بڕە پارەیەیە کاتی خۆی بە مانچێستەر سیتییان داوە. نرخی ئەم یاریزانە دوای درەوشانەوەی لە مۆندیالی 2026 و بەدەستهێنانی نازناوەکە لەگەڵ هەڵبژاردەی ئیسپانیا رووی لە بەرزبوونەوە کردووە.
پلانەکەی پاریس و قەیرانی هێرشبەر لە بارسا
پاریس سانجێرمان دوای تەواوبوونی فرۆشتنی راندال کۆلۆ موانێ بۆ یوڤێنتوس، بەفەرمی هەنگاو بۆ گواستنەوەی فێران دەنێت.
رۆیشتنی فێران تۆرێس، بارسێلۆنا دەخاتە قەیرانێکی گەورەوە لە هێڵی هێرشبەریدا، چونکە جگە لەو، تەنیا بەهرەمەندی میسری حەمزە عەبدولکەریم وەک سەرەڕم دەمێنێتەوە، ئەمەش فلیک ناچار دەکات داوای کڕینی هێرشبەرێکی نوێ بکات لە مێرکاتۆیەکدا کە بژاردە گونجاوەکان تێیدا کەم و گرانن.
ئێستا تۆپەکە لە گۆڕەپانی فێران تۆرێسدایە؛ یان دەبێت بە مەرجە داراییەکانی بارسا رازی بێت و لەژێر سەرپەرشتی فلیک بەردەوام بێت، یان جانتاکانی تێکدەپێچێت و بەرەو پاریسی پایتەختی فەرەنسا بەڕێدەکەوێت.
