Berpirsekî Amerîkayê ji ber Rûsya û Hemasê diçe Tirkiyeyê

Hewlêr (Rûdaw) - Musteşarê Xezîneya Amerîkayê yê Berpirsê Îstixbarata Teror û Darayî, bi rojeva cezayên ku li ser Hemas û Rûsyayê hatine sepandin diçe Tirkiyeyê.

Li gorî nûçeya Bloombergê, Musteşarê Xezîneya Amerîkayê yê Berpirsê Îstixbarata Teror û Darayî Brian Nelson bi armanca gotûbêj û bicihkirina cezayên ku li ser Hemas û Rûsyayê hatine sepandin diçe Tirkiyeyê.

Hinek çavkaniyan ji Bloombergê re ragihand ku Brian Nelson dê di serdana xwe ya Enqerê de “ji Tirkiyeyê bixwaze ku pabendî cezayên Amerîkayê yên li ser Rûsya û Hemasê hatine sepandin, bibe.”

Ev serdan di sala 2023yan de dibe serdana duyem a Nelson.

Wezareta Xezîneyê ya Amerîkayê meha borî bi hinceta ku piştgiriya Hemasê dikin û pereyan didin wê rêxsitinê li ser hejmarek welatiyên Tirkiyeyê ceza sepandibû.

Ji aliyê din ve li gorî nûçeya Financial Timesê, di demên dawî de Tirkiyeyê firotinên kelûpelên leşkerî yên ji Rûsyayê re zêde kirine.

Kompanyayên Rûsyayê jî ji ber cezayên Amerîka û Ewropayê kelûpelên leşkerî yên pêwîst bi rêya kompanyayên Tirkiyeyê dabîn dikin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger