Hewlêr (Rûdaw) – Senatorê Demokrat ê Amerîkayê û Endamê Komîteya Pêywendiyên Derve ya Senatoyê Tim Kaine got, “Ez ji tundiya li Sûriyeyê dilgiran im.”
Senatorê Demokrat ê Amerîkayê û Endamê Komîteya Pêywendiyên Derve ya Senatoyê Tim Kaine, di bersiva nameyeke lêkolerê Kurd Azad Dêwanî de li ser tundûtûjiya dînî ya li Sûriyeyê dilgiraniya xwe anî ziman û ji Serokkomarê Sûriyeyê Ehmed Şer xwest ku li hemberî van kiryaran helwesteke tund nîşan bide û bingehekê ji bo paşerojeke demokratîk deyne.
Lêkoler û akademîsyen Azad Dêwanî ji Rojavayê Kurdistanê ye û di nameyekê de li ser Sûriyeyê hişyarî dabû Senatorê Demokrat ê Amerîkayê û Endamê Komîteya Pêywendiyên Derve ya Senatoyê Tim Kaine.
Azad Dêwanî li ser sedema şandina nameya xwe ji Rûdawê re ragihand, ew ji wê yekê dilgiran e ku Ehmed Şer desthilata Sûriyeyê xistiye destê xwe û got:
"Serkeftina Colanî [Ehmed Şer] a di warê dîplomasiyê de, ji bo aramiyê pirsgirêkan çêdike."
Tim Kaine amaje bi krîza li parêzgeha Siwêdayê û bandora wê ya li ser civaka Durziyan kir û da zanîn ku piştî rûxîna desthilata Beşar Esed a Kanûna Pêşîn a 2024an Sûriye di pêvajoyeke siyasî ya nearam re derbas bûye.
Kaine behsa tundiyên Tîrmeha 2025an ên li Siwêdayê kir ku di navbera çekdarên eşîrên Bedewî yên nêzîkî hikûmeta Sûriyeyê û civaka Durziyan de rû dabûn û li ser vê yekê dilgiraniya xwe anî ziman.
Tim Kaine her wiha behsa bûyerên li herêmên beravê yên Sûriyeyê jî kir.
Senatorê Demokrat xwest ku hewldanên ji bo rakirina cezayên li ser berpirsên Sûriyeyê bi mercên tund ên hikûmeta Amerîkayê ve were girêdan, li gel pêbendbûna hikûmeta Şer a bi avêtina gavên pêwîst ber bi paşerojeke demokratîk ve.
Tim Kaine soz da ku wekî endamekî Komîteya Pêywendiyên Derve û demokratxwazekî sereke yê di Komîteya Mafên Mirovan de dê di "çavdêrîkirina hûr a rewşê, zextkirina ji bo berpirsyariyê û parastina aştî û aramiyê ya li seranserî Sûriyeyê" de berdewam be.
#VÎDEO - Senator Tim Kaine: Em ji tundiyên li Sûriyeyê dilgiran in
— RudawKurdi (@RudawKurdi) October 18, 2025
Senator Tim Kaine (@SenTimKaine ) li ser rewşa pêkhateyên li Sûriye û Rojavayê Kurdistanê bersiva nameyeke akademîsyenê Kurd Azad Dêwanî da
Akademîsyen Azad Dêwanî: Tirs heye ku bibe rejîmeke dîktator#Rojava pic.twitter.com/mr6IpgL4R5
.webp&w=3840&q=75)
