Hewlêr (Rûdaw) - Fermandarê Fermandariya Navendî ya Hêzên Amerîkayê (CENTCOM) Brad Cooper li ser bûyerên dawî yên li bajarê Helebê û derdora wê daxuyaniyek belav kir û bangî hemû aliyan kir ku "herî zêde xwe ragirin."
Brad Cooper diyar kir ku ew geşedanên li Helebê û herêmên derdora wê ji nêzîk ve dişopînin.
"Divê parastina sivîlan bibe pêşengî"
Fermandarê CENTCOMê bangî aliyên li qadê kir ku ji bo rêlibergirtina aloziyan gavan biavêjin û got:
"Em bang li hemû aliyan dikin ku herî zêde xwe ragirin û ji wan tevgerên ku tansiyonê zêdetir dikin dûr bikevin. Divê parastina sivîlan û binesaziyên krîtîk wekî pêşengî were dîtin."
"Li maseya dan û standinan vegerin"
Brad Cooper her wiha bangî aliyên peywendîdar kir ku bi rêyên dîplomatîk pirsgirêkan çareser bikin û wiha pê de çû:
"Em banga xwe ya ji bo hemû aliyên peywendîdar ducare dikin da ku bi niyeta baş li ser maseya danûstandinan vegerin û bi rêya diyalogê li pey çareseriyeke dîplomatîk a mayînde bin.
Wekî ku min berê jî gotibû, Sûriyeyeke ku di nav xwe de û li gel cîranên xwe di aştiyê de be, dikare bibe sedema Rojhilateke Navîn a biaramtir û dewlemetir."
Cooper di dawiya daxuyaniya xwe de destnîşan kir ku parastina aştî û aramiya li herêmê berjewendiya hevbeş a Dewletên Yekbûyî yên Amerîkayê û Sûriyeyê ye.
