Hewlêr (Rûdaw) – Serokkomarê Tirkiyê di lûtkeya NATO ya li Lîtvanyayê de di bersiva pirsa Nûçegihanê Rûdawê Zinar Şîno ya li ser hinardekirina petrola Herêma Kurdistanê de got, “Ji bo ku rayedarên bakurê Iraqê û hikûmeta navendî pirsgirêkên xwe çareser bikin jî me gav avêtin. Dema ku ev pirsgirêk ji holê hatin rakirin, em alîgirê vekirina boriyan petrolê ne.”
Serokkomarê Tirkiyê Recep Tayyîp Erdogan îro Çarşemê 12ê Temûza 2023an di lûtkeya NATOyê ya li Lîtvanyayê de ragihand, “Di warê wergirtina petrola Iraqê de ti pirsgirêkên me nînin. Ew pirsgirêka heyî nakokiya li hundirê Iraqê ya di navbera hikûmeta navendî û hikûmeta bakurê Iraqê de ye.”
Hinardekirina petrola Herêma Kurdistanê û Kerkûkê ku bi rêya boriya Ceyhanê digihêje Tirkiyê û ji wir hinardeyî welatên din ên ku kiryarê petrolê ne tê kirin, ji 25ê Adarê ve, wate 109 roj in hatiye ragirtin. Ev jî 2 rojan berî biryara Dadgeha Mufetîş a Navdewletî ya Parîsê hate cibicîkirin.
Dadgeha Mufetîş a Navdewletî ya Parîsê li ser gilîkirina Iraqê ya li dijî Tirkiyê ya li ser hinardekirina petrola Herêma Kurdistanê biryar di berjewendiya Iraqê de da û piştî wê biryarê hate rawestandin. Wê demê Tirkiyê ragihandibû ku ew dê pabendî biryarê bibin û ji ber wê jî hinardekirina bi boriya Ceyhanê heta niha dest pê nekiriye.
Erdogan: Em li ser bingeha qezenc-qezencê dixebitin û pirsgirêk di navbera bakurê Iraqê û hikûmeta navendî de ye
Erdogan di beşeke din a axavtina xwe li ser heman pirsê de ji Rûdawê re got, “Ji bo şopandina vê mijarê û bi wan re hevdîtinan pêk bînin min hevalên xwe erkdar kirine. Ji bo ku rayedarên bakurê Iraqê û hikûmeta navendî pirsgirêkên xwe çareser bikin jî me gav avêtin.”
Erdogan her wiha anî ziman, “Dema ku ev pirsgirêk ji holê hatin rakirin, em alîgirê vekirina boriyan petrolê ne. Ji ber ku em li ser bingeha qezenc-qezencê dixebitin. Ew qezenc dikin û em jî qezenc dikin.”
Erdogan li ser hinardekirina petrola Herêma Kurdistanê bersiva Rûdawê da: Di warê kirîna petrola Iraqê de ti pirsgirêkên me nînin pic.twitter.com/O0bTEa5TNH
— RudawKurdi (@RudawKurdi) July 12, 2023
Ev gotinên Erdogan di demekê de ne ku Iraqê û Herêma Kurdistanê ji ber rawestandina hinardekirina petrolê ku çavkaniya sereke ya mûçexwirên Herêma Kurdistanê ye, mehane zêdetirî 850 milyon dolaran ziyan dibînin.
Çend civînên bilind di navbera Iraqê û Herêma Kurdistanê de hatin lidarxistin, her wiha çend civîn jî di navbera Wezareta Petrolê ya Iraqê, Kompanyaya Bazirkirina Petrola Iraqê (SOMO) û nûnerên Tirkiyê û Herêma Kurdistanê de hatin lidarxistin.
