Hewlêr (Rûdaw) - Fransayê ciwanê Kurd ê bi navê Mehmet Kopal radestî Tirkiyeyê kir. Birêveberiya Ewlehiya Giştî ya Tirkiyeyê ragihand ku Kopal “endamê rêxistinê” ye.
Konseya Demokratîk a Kurd a Fransayê (CDK-F) jî radestkirina Kopal şermezar kir.
Îro Birêveberiya Ewlehiya Giştî ya Tirkiyeyê (EGM) di daxuyaniyekê de eşkere kir ku “Mehmet Kopal ê endamê PKK/KCKyê” ji Fransayê anîne Tikiyeyê.
Di daxuyaniyê de Birêveberiya Ewlehiya Giştî ya Tirkiyeyê ragihand ku “endamê rêxistina PKK/KCKyê yê bi navê Mehmet Kopalê ku li ser asta Tirkiyêyê biryara lêgerînê li ser wî hebû, bi hevahengiya EGM û Serokatiya Daîreya Interpol-Europol Serokatiya Daîreya Dijî Terorê û Serokatiya Îstîxbarata Neteweyî di 9ê Nîsanê de ji Fransayê anîne Tirkiyeyê.”
Li aliyê din Konseya Demokratîk a Kurd a Fransayê (CDK-F) jî derbarê bûyerê de daxuyaniyek belav kir.
CDK-Fyê ragihand ku Mehmet Kopal çalakvanek e û ji aliyê Fransayê ve hatiye dersînorkirin.
Herwiha CDK-Fyê got, “Ev radestkirin encama hevkariya Fransa û Tirkiyeyê nîşan dide û li dijî mafên bingehîn ên mirovan e.”
Di meha adarê de jî Fransayê çalakvanê Kurd ê bi nave Firaz Kokrmaz radestî Tirkiyeyê kiribû û li Tirkiyeyê hatibû girtin.
