Hewlêr (Rûdaw) - Parlamenterê Partiya Gel a Komarî (CHP) Sezgîn Tanrikulu li girtîgeha Edîrneyê hevserokê berê yê HDPyê Selahattîn Demîrtaş û hevserokê berê yê Şaredariya Bajarê Mezin a Amedê Selçuk Mizrakli ziyaret kirin.
Parlamenterê CHPyê yê Amedê Sezgîn Tanrikulu piştî serdanê, li pêşiya girtîgehê daxuyaniyek da û got ku rewşa tenduristiyê ya Demîrtaş û Mizrakli gelekî baş e.
Sezgîn Tanrikulu diyar kir ku Demîrtaş bi salan e li Tirkiyeyê wekî rehîneyekî siyasî yê pirsa Kurd hatiye girtin.
Tanrikulu diyar kir ku Demîrtaş di encama darizandineke neheq de hatiye mehkûmkirin û dosyeya wî niha li îstînafê ye.
“Wekî rehîneyekî siyasî yê pirsa Kurd hatiye girtin”
Tanrikulu da zanîn ku Demîrtaş tevî biryarên Dadgeha Mafên Mirovan a Ewropayê nehatiye berdan û got:
“Ez li Edîrneyê me. Min li Girtîgeha Edîrneyê dostên xwe Selhattîn Demîrtaş û Selçuk Mizrakli ziyaret kirin.
Rewşa tenduristiyê ya her duyan jî baş e. Silavên xwe gihandin hemû dost û bajariyên me yên ku pirsa wan dikin.
Ez jî ji vê derê silav û rêzên wan digihînim we. Selahattîn Demîrtaş bi salan e li Tirkiyeyê wekî rehîneyekî siyasî yê pirsa Kurd hatiye girtin.
Dadgeha Mafên Mirovan a Ewropayê biryara berdanê daye.
Tevî ku dibêje nikare bê girtin, ev biryar nehat bicihkirin û heta niha li girtîgehê hatiye ragirtin.
Di encama darizandineke neheq de hat mehkûmkirin û dosyeya wî niha li îstînafê ye.
"Helbet dê rojên wiha hebin..."
Geşedanên siyasî jî ji nêzîk ve dişopîne. Helbet dê rojên wiha hebin ku em meseleya Kurd a Tirkiyeyê ne li pêşiya girtîgeh û salonên dadgehê biaxivin.”
