Hewlêr (Rûdaw) – Li parêzgehên Wan û Îzmîrê 2 erdhej çêbûn.
Li navçeya Karaburunê ya Îzmîrê bi hêza 4,2 pileyan erdhejek çêbû ku kûrahiya wê zêdetirî 7 kîlometreyan bin erdê bûye.
Serokatiya Rêveberiya Karesat û Rewşên Bilez (AFAD) ragihand ku li parêzgeha Îzmirê ya Deryaya Egeyê saet 01:59an bi hêza 4,2 pileyan erdhejek çêbûye.
AFADê kûrahiya wê jî wek 7,44 kîlometre bin erdê diyar kir.
Çend roj in bi taybetî li parêzgeha Bursayê erdhejên zêdetî 4 pile çêdibin û pisporên erdhejê hişyariyê didin ku li wê herêmê qelşek di tevgerê de ye.
Li Wanê erdhej
Li navçeya Tûşbayê ya parêzgeha Wanê jî bi hêza 3,9 pileyan erd hejiya.
AFADê herwiha ragihand ku li navçeya Tûşbayê ya Wanê saet 08:58an bi hêza 3,9 pileyan erdhejek çêbûye û kûrahiya wê 7 kîlometre bin erdê ye.
Piştî erdhejên 6ê Sibata 2023yan zêdetirî salekê ye erdhejên paşekî berdewam in û pisporên erdhejê bi taybetî hişyariyê didin ku divê ji bo erdhejên bihêz jî amadekarî werin kirin.
