Hewlêr (Rûdaw) - Brîtanyayê cezayên li ser 24 saziyên Sûriyeyê ku di nav de Bankaya Navendî ya Sûriyeyê û şirketên enerjiyê jî hene rakirin.
Wezareta Karên Derve ya Brîtanyayê li ser rakirina cezayan daxuyaniyek belav kir.
Di daxuyaniya nivîskî ya Berdevkê Wezareta Karên Derve ya Brîtanyayê de hat ragihandin ku cezayên li ser 24 saziyan hatin rakirin ku rejîma Beşar Esed ji bo zilma li ser gelê Sûriyeyê bi kar dianîn.
Di nav wan saziyan de Bankaya Navendî ya Sûriyeyê, Firokevaniya Erebî ya Sûriyeyê û şirketên enerjiyê jî hene.
Di daxuyaniya Berdevkê Wezareta Karên Derve ya Brîtanyayê de hat diyarkirin:
“Ev nêzîkbûn, biryardariya me ya ji bo alîkariya gelê Sûriyeyê ji bo avakirina welat û aboriya wan dubare dike ku di nav de piştgiriya ji bo pêvajoya derbasbûneke siyasî heye.
Em dê bi kiryarên wan desthilata demkî ya Sûriyeyê binirxînin.”
Di daxuyaniyê de hat gotin ku cezayên li ser endamên rejîma Beşar Esed û kesên ku di bazirganiya captagonê de beşdar bûne dê berdewam bin.
