Hewlêr (Rûdaw) – Keça Kurd a 22 salî, “Jîna Emînî” ku li Tehranê ji aliyê polîsên Îranê ve bi hinceta pabendnebûna bi hicaba îslamî hatibû desteserkirin û piştre bi awayekî ji hişçûyî bo nexweşxaneyê hatibû veguhestin, îro piştî 3 rojan li nexweşxaneyê canê xwe ji dest da.
Li gor zanyariyan, “Jîna Emînî” ku di medyayên Îranê wek “Mehsa Emînî” jî navê wê hatiye nivîsandin, îro Înê 16ê Îlona 2022an piştî nîvro li Nexweşxaneya Kesra ya Tehranê canê xwe ji dest daye.
Jîna Emînî xelkê navçeya Seqizê ya Rojhilatê Kurdistanê û 22 salî bû û tevî malbata xwe ji bo serdankirina xizm û kesûkarên xwe çûbû Tehranê.
Êvara roja Sêşembê 13ê Îlona 2022an di demekê de ku keça Kurd Jîna Emînî bi birayê xwe Kiyareş Emînî re bûye, li stasyona Heqanî ya metroyê li Tehranê ji aliyê polîsên Tehranê ve bi hinceta ku “pabendî hicaba îslamî nebûye”, hatibû desteserkirin û bo girtîgeha polîs a li cadeya Wezîran a Tehranê hatibû şandin.
Kesên ku di dema desteserkirinê de bi Jîna re bûne, ji medyayên Îranê re gotine ku di dema veguhastina bo navenda polîs de, polîsan li wê keça Kurd xistine û li navenda polîsan rewşa wê ya tendirustiyê xirab bûye.
Kiyareş Emînî, birayê Jînayê jî ji medyayên Îranê re gotiye, ligel Jînayê hejmarek jinên din jî hatin desteserkirin û hêzên polîs ji wan re gotin ku dê wan bibin girtîgeha demkî ya Wezîran a Tehranê û piştî ku hin rênimayî derbarê hicabê û cilûbergan û derketina wan bo cihê giştî bidin wan, dê wan azad bikin.
Birayê wê keça Kurd herwiha dibêje, piştî demekê hejmarek jin hatin berdan, lê belê Jîna nehat derve û piştî ku wî pirs kiriye hêzên polîs jê re gotine xwîşka wî tûşî krîza dil bûye û ew rakirine nexweşxaneya Kesrayê.
Rêxistinên mafên mirovan ên Rojhilatê Kurdistanê ragihandine, piştî ku rewşa tendirustiya wê keça Kurd li navenda polîs xirab dibe, dereng bo nexweşxaneyê hatiye veguhastin.
Malbat û xizmên Jîna Emînî ragihandine, li nexweşxaneyê ji wan re gotine, Jîna tûşî krîza dil û mejî bûye û ji hişê xwe çûye û di komayê de ye.
Hejmarek rojnamevanên Îranî û Rojhilatê Kurdistanê ji zarê pizîşkên Nexweşxaneya Kesra (Kasra) ya Tehranê belav kirine, Jîna (Mehsa) Emînî tûşî krîza mejî û dil nebûye, lê derb li ser wê hatiye xistin, ji ber wê jî serê wê şikestiye û tûşî xwînberbûna mejî bûye.
Mojgan Emînî, dayika Jîna Emînî ji medyayên Îranê re ragihandiye, ti pirsgirêkeke cilûbergên keça wê nebûye û mantoyeke dirêj li xwe kiribû û leçikek mezin jî li serê xwe kiribû, lê tevî wê jî polîsan ew desteser kirin.
Dayika wê keça Kurd herwiha daye xuyakirin, di dema desteserkirinê de birayê Jînayê jî pê re bûye û hêzên polîs li birayê wê xistine, ji ber ku li dijî desteserkirina xwîşka xwe bertek nîşan daye.
Sefa, Xalê Jînayê roja Pêncşembê 15ê Îlona 2022an ji Rûdawê re ragihand, “Jîna roja Duşembê ligel malbata xwe ji bo serdana xizmên xwe çûne Tehranê û êvara Sêşembê jî bi birayê xwe re derketiye derve, lê piştî hatiye desteserkirin, rakirine nexweşxaneyê û niha di komayê de ye. Pizîşkan gotine ti hêviyeke wan nîne ku Jîna baş bibe û vegere bo jiyanê.”
Polîsê Tehranê duh derbarê bûyerê de daxuyaniyek kurt belav kir û têde ragihand, “Jinek ku ji bo hişyarkirinê û dayîna rênimayiyan bo navendeke polîs hatibû şandin, ji nişka ve krîza dil derbas kiriye û bo nexweşxaneyê hatiye veguhastin.”
Serokkomarê Îranê Îbrahîm Reîsî ku ji bo beşdariya di Lûtkeya Rêxistina Hevakriyê ya Şanghay de serdana Ozbekistanê kiriye, derbarê bûyerê de ferman da Wezîrê Navxwe yê Îranê ku dest bi lêkolînan bike.
Piştî fermana Reîsî, Wezîrê Navxwe yê Îranê Ehmed Wehîdî ferman da Cîgirê Ewlekariyê yê Wezaretê Seyid Mecîd Mîr-ehmedî ku bi awayekî bilez derbarê bûyerê û sedemên wê de lêkolînê bike û encamên lêkolînê ji wî re bişîne.
Serokê Navenda Parêzerên Dadweriyê ya parêzgeha Sineyê, Ehmed Namdarî ji polîsê Îranê xwestiye, têkildarî “reftara kirêt û serederiya nehêja” ya li gel keça Kurd ‘Jîna Emînî’ berpirsyariyê qebûl bike û bersiva xelkê û raya giştî bide.
Desthilata Dadweriya Îranê jî di daxuyaniyekê de ragihandiye, piştî belavbûna hin nûçe û zanyariyan derbarê bûyera ku ji bo “xanim Mehsa Emînî li navendeke polîs çê bûye, Dozgerê Giştî û Şoreşê yê Tehranê Elî Salihî ferman daye ku tîmeke taybet a lêkolînê bê avakirin.”
Ehmed Namdarî ragihandiye, berevaniya di ber Jîna (Mehsa)Emînî de ji erkên wê navenda parêzeran e û tekez kiriye, eger malbat qebûl bike, ew dê dozê bişopînin û heta derketina biryara dadgehê û standina mafê wê keça Kurd nesekinin.
.webp&w=3840&q=75)