Rojhilata Navîn
Li Îraq û hinek parêzgehên Başûrê Kurdistanê dengdana taybet bi rê ve çû / Wêne: Rûdaw
Hewlêr (Rûdaw) – Komîsyona Bilind a Hilbijartinan a Îraqê ragihand ku, rêjeya beşdariyê di dengdana taybet a hilbijartinên encûmenên parêzgehan û kampên koçberan de zêdetirî ji sedî 67 bûye.
Li Îraq û hinek parêzgehên Başûrê Kurdistanê dengdana taybet ji bo hilbijartinên encumenên parêzgehan bi rê ve çû.
Li Îraq û hinek parêzgehên Başûrê Kurdistanê hêzên ewlehiyê û koçberên navxwe yên li kampan dijîn, îro ji bo "dengdana taybet" a hilbijartinên herêmî yên ku dê roja duşemê bên lidarxistin, çûn ser sindoqan.
Li 15 parêzgehên Îraq û Herêma Kurdistanê îro saet 07:00an bi dema herêmî proseya dengdana taybet dest pê kir.
Proseya dengdanê heta saet 18:00an berdewam kir.
Ji zêdeyî milyonek dengdêran re deriyên sindoqan hatin vekirin
Ji milyonek û 2 hezar û 393 endamên hêzên ewlehiyê û 48 hezar koçberên navxwe yên li Herêma Kurdistanê re deriyê sindoqên dengdanê hatin vekirin.
Li Hewlêrê 5 hezar û 230 koçberên li kampan û 15 hezar û 492 endamên hêzên ewlehiyê yên li derveyî kampan mafê dengdanê hebûn.
Rêveberê Ofîsa Teknîkî ya Komîsyona Bilind a Serbixwe ya Hilbijartinan a Îraqê Botan Şêrko ji Rûdawê re ragihand ku nêzîkî 2 hezar koçber û 13 hezar karmendên asayişê deng dane.
Peyamnêrê Rûdawê Erkan Elî ragihand ku beşdariya hilbijartinên navçeyên Erbet û Aşti yên Silêmaniyê ji sedî 77 û li Xaneqînê jî ev rêje ji sedî 75 bûye.
Qeymeqamê Şexanê Serdar Şêx Yehya jî da zanîn ku heta saet 17:40an beşdariya hilbijartinan gihiştiye ji sedî 63an.
Li gorî zanyariyên ku ji Şaxa Komisyona Bilind a Serbixwe ya Hilbijartinan a Zaxoyê hatine wergirtin, li tevahiya kampên Zaxoyê beşdarî ji sedî 74 bû.
Li gel encamên hilbijartinên giştî dê encaman bên ragihandin
Di hilbijartinan de bi giştî 5 hezar û 904 namzed ji partî û tifaqên curbecur hevrikiyê dikin û tê de nêzîkî 16 milyon kesan mafê dengdanê heye.
Kurd li Kerkûk, Mûsil, Diyala, Selahedîn û Bexdayê bi lîsteyên cuda beşdarî hilbijartinan dibin.
Endamê Komisyona Bilind a Serbixwe ya Hilbijartinan a Îraqê Hesen Hadî jî ji Rûdawê re got:
“Encamên hilbijartinên îro dê ligel hilbijartinên 18ê Kanûna Pêşînê werin eşkerekirin.”
Rêjeya beşdariyê li gorî hilbijartinên berê zêde bû
Li gorî agahiyên Rûdawê ku ji çavkaniyên Komîsyona Bilind a Hilbijartinan a Îraqê bi dest xistine, rêjeya beşdariya dengdana li gorî hilbijartinên berê zêde bûye.
Li gorî vê yekê rêjeya beşdarbûna hilbijartinan li hinek parêzgehan wiha bû:
Diyale: ji sedî 78
West: ji sedî 74
Dîvaniye: ji sedî 77
Besra: ji sedî 71
Kerbela: ji sedî 66
Necef: ji sedî 68
Nînowa: ji sedî 75
Zikar: ji sedî 72
Babîl: ji sedî 69,7
Meysan: Ji sedî 67
Selahedîn: Ji sedî 76
Kerkûk: Ji sedî 70.2
Hêzên asmanî yên Îraqê dê piştî dengdanê sindoqên dengdanê bibin Navenda Komîsyona Bilind a Hilbijartinên Îraqê ya li Bexdayê.
Desteya Ragihandinê: Binpêkirin ji sedî 20 kêm bûn
Komîsyona Ragihandin û Medyayê ya Îraqê daneyên li ser dengdana taybet parve kir û ragihand ku binpêkirin li gorî hilbijartinên berê ji sedî 20 kêm bûne.
Di daxuyaniya komîsyonê de hat destnîşankirin ku hilbijartinên parêzgehan ji aliyê 124 kanalên ragihandinê ve hatine şopandin û li gorî hilbijartinên parlamentoya sala 2021an ji sedî 20 kêmbûna binpêkirinan hatiye tomarkirin.
Rêjeya beşdariyê zêdetir ji sedî 67 bû
Komîsyona Bilind a Hilbijartinan a Îraqê diyar kir rêjeya beşdariyê zêdetirî ji sedî 67 bûye.
Di hilbijartinên herêmî yên ku li parêzgehên Îraqê tên kirin de mafê 16 milyon û 158 hezar û 788 kesan heye.
Hilbijartinên herêmî yên li Îraqê herî dawî di sala 2013yan de hatibûn kirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse