Hewlêr (Rûdaw) – Li gundê Kurmeşê yê navçeya Pêrtagê ya Dêrsima Bakurê Kurdistanê bi rêbazên kevneşop qehweya kizwanan tê çêkirin.
Darên kizwanan diweşînin û wan di hawaneke kevir ku jê re dibêjin “sikot” de dihêrin.
Bi rêbazên kevneşop qehweyeke taybet û xwezayî çêdikin û difiroşin.
“Derman e”
Welatî Mahmut Irmak got:
“Payîzê kesk dibin lê beriya wê sor in. Em li bin daran çadirê radixin û bi şivikan wan dadiweşînin.
Piştre dişon û li ber tavê ziha dikin. Wan heb heb dikin û dineqînin. Piştre li ser sêlê diqelînin û dihêrin.”
Hejmareke zêde ya şêniyên vî gundî li derveyî Tirkiyeyê dijîn û demsala havînê serdana gundê xwe dikin.
Li gorî wan qehweya kizwanan ji bo gelek nexweşiyan jî derman e.
Welatî Semi Ber jî da zanîn:
“Dema ku ez diçim Almanyayê bi xwe re dibim. Ez bi şewbê ketibûm û ez pê baş bûm.
Mirov dikare zeyta wê jî vexwe, hem ji bo qiriqê û hem jî ji bo mîdeyê gelekî baş e.
Bi giştî xwezayî ye û di nav de ti madeyeke kîmyayî nîne.”
Gundê Kurmeşê ji 400 malan pêk tê û çavkaniya debara jiyana wan ajeldarî ye.
Li gund hejmareke zêde ya darên kizwanan jî hene ku berhema wan tê komkirin û ji bo qehweyê tê bikaranîn.
Qehweya ku tê çêkirin jî kîloya wê bi 300-400 lîreyan tê firotin ku nêzîkî 12 dolaran dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse