Wêne: Rûdaw Grafîk
Zaxo (Rûdaw) - Xelkê Gundê Çimbilkê yê nahiyeya Kanî Masê ji ber şerê di navbera PKK û Tirkiyeyê de neçar maye gundê xwe vala bike.
Ji ber şer du rojan berî niha agir bi gund ket û şêniyên gund koçber bûn.
Beşek ji wan çûne Dihokê û beşek jî li gundên derdorê bi cih bûne.
Di encama şer û pevçûnên PKK û artêşa Tirkiyeyê 24ê Tebaxê agir bi gund ket û tevî 3 xaniyan hemû rez û bîstanên gundiyan şewitîn.
Herêm cihekî leşkerî ye, gund vala bûye û kes tê de nemaye.
Malbata Mam Tahir piştî şerên giran bûye du beş û aware bûye.
Ew niha li gundê Mêrga Qesrê dimîne, 9 kesên ji malbata wî jî çûne Dihokê.
Cotkarê ji gundê Çimbilkê Tahir Emîn li ser rewşa dawî ya gund got:
“Em niha çûn Mêrga Qesrê. Rez û eqar hemû şewitîn, tiştek nema.
Êdî ji ber ku hemû şewitîn jiyan li vir zehmet e.
Zehmet e mirov ji nû ve ava bike.”
Li derdora gund bermahiyên şerên giran hene.
Gund wêran bûye û vegera jiyanê lê zehmet bûye.
“Xelk were dê çi bike?”
Muxtarê gundê Çimbilkê Nizar Ebas jî anî ziman:
“50-60 donim erdên gundê Çimbilkê hemû şewitîne. Xelk were dê çi bike?
Tu bi salan pereyan berhev dikî û ji xwe re cihekî ava dikî lê zehmet e piştî ku şewitî careke din ava bikî.”
Bi giştî 8 malbatên gundê Çimbilkê çûne gundên derdorê û Dihokê.
Yek ji wan malbata Çiya ye û ew di nav agir de mabû.
Çiya bi zehmetî xwe rizgar kir, niha ew jî ji gundê xwe derketiye û bê dahat maye.
Cotkarê bi navê Çiya Necat got:
“Ji her çar aliyan ve agir hat ser xaniyê me.
Ez di mala xwe de di nav agir de mam.
Li nêzîkî min xortimek hebû, min xwe bi wê şil kir û ji nav wî agirî derketim.
Jiyana me hemû li ser gund bû. Rez, bîstan û pez bû, niha nema, hemû şewitî.
Em jî çûn bajêr û di maleke kirê de dimînin.”
Gundê Mîskanê yê ku 3 kîlometreyan ji gundê Çimbilkê dûr e niha herêmeke germ a şerê di navbera PKK û Tirkiyeyê de ye.
Ji 20ê Hezîranê ve bi berdewamî şer û alozî lê rû didin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse