Hewlêr (Rûdaw) - Berdevka Wezareta Karên Derve ya Amerîkayê li ser peymanên Amerîka û Herêma Kurdistanê ragihand, “Em piştgiriya peymanan dikin.”
Berdevka Wezareta Karên Derve ya Amerîkayê Tammy Bruceyê li ser peymanên Herêma Kurdistanê û kompanyayên Amerîkî ji Tora Medyayî ya Rûdawê re ragihand:
“Kompanyayên Amerîkî bi qasî milyaran dolaran veberhênan di warê petrola Herêma Kurdistanê de kiriye.
Em hêvî dikin veberhênana zêdetir a Amerîkayê li Îraqê bibînin.”
Berdevka Wezareta Karên Derve ya Amerîkayê piştgiriya welatê xwe ya ji bo peymanan anî ziman û Bexda û Hewlêrê teşwîq kir ku “ji bo hilberîna gazê hevahengiyê bikin”.
Tammy Bruceyê behsa civîna Wezîrê Karên Derve yê Amerîkayê Marko Rubio û Serokwezîrê Herêma Kurdistanê Mesrûr Barzanî kir û got:
“Wan behsa derfetên zêdekirina bazirganî û veberhênana di navbera Amerîka û Herêma Kurdistanê de kir.”
Berdevka Wezareta Karên Derve ya Amerîkayê ji Rûdawê re got:
“Marko Rubio ji bo peymanên Herêma Kurdistanê û kompanyayên Amerîkî yên ji bo zêdekirina hilberîna gazê destxweşî li Mesrûr Barzanî kiribû.”
Bruceyê da zanîn ku her wiha beşeke din a gotûbêjên civîna Marko Rubio û Mesrûr Barzanî parastina mafên pêkhateyan li Îraq û Sûriyeyê bû.
Berdevka Wezareta Karên Derve ya Amerîkayê her wiha diyar kir ku Marko Rubio piştgiriya Amerîkayê ya ji bo “Herêmeke Kurdistana Îraqê ya xurt” eşkere kiribû.