Hewlêr (Rûdaw) - Serokê Yekîtiya Nîştimanî ya Kurdistanê (YNK) Bafil Talebanî li ser peyama Ocalan got, “Yekîtiya Nîştimanî ya Kurdistanê vê peyamê bi destpêk û qonaxeke giring dibîne.”
Abdullah Ocalan xwest ku PKK xwe fesix bike û çekan deyne.
Serokê Yekîtiya Nîştimanî ya Kurdistanê (YNK) Bafil Talebanî piştî vê yekê got:
“Em pêşwaziyê li peyama Abdullah Ocalan dikin û bi bawer in ev peyameke berpirsiyarane û pêwîst a vê qonaxê ye.
Em piştevanê xwişk û birayên xwe yên her çar parçeyên Kurdistanê ne.”
Hemû peyama Bafil Talebanî bi vî rengî ye:
“Em pêşwaziyê li peyama Abdullah Ocalan dikin û bi bawer in ev peyameke berpirsiyarane û pêwîst a vê qonaxê ye ji bo yekxistina rêzên Kurdayetiyê û çareserkirina aştiyane ya pirsgirêkan li ser bingeh û jiyaneke hevpar ji bo avakirina paşerojeke geştir û aramtir ji bo gelê me.
Yekîtiya Nîştimanî ya Kurdistanê vê peyamê bi destpêk û qonaxeke giring dibîne û wek erkeke netewî ya berpirsiyar, piştevanê vê peyamê û serxistina her gav û projeyekê ye ku giyana jiyana hevpar û biratiyê di navbera Kurd û Tirkan de pêş ve bibe.
Em hêvîdar in em hemû bi hev re vê bangê qebûl bikin û gavên pratîkî ji bo gihiştina aştiya giştî û vê firsenda dîrokî wenda nekin ku Serok Mam Celal kevirê bingehîn ê wê ji sala 1993yan ve daniye.
Me her tim gotiye, em piştevanê xwişk û birayên xwe yên her çar parçeyên Kurdistanê ne.
Bafil Celal Talebanî
Serokê Yekîtiya Nîştimanî ya Kurdistanê.”