Şaşiyek çêbû. Tika ye paşê dîsa hewl bide.
Ji ber bombebarana artêşa Tirkiyê agir derketiye
Duhok (Rûdaw) – Ji ber bombebaranên Tirkiyeyê yên ku hefteyekê ye didomin, li derdora nahiyeya Dêrelokê ya Amêdiyê ya Başûrê Kurdistanê agir bi daristanên sînorê 4 gundan ketiye û heta niha ew agir bi temamî nehatiye vemirandin.
Zêdeyî hefteyekê ye li gundên Sergele, Bercî, Guhare û Belav ên Amediyê agir derketiye. Agir çend caran hatiye vemirandin lê ji ber topbaran û bombebaranên artêşa Tirkiyiyê dîsa pê ketiye.
"Ev zêdeyî hefteyekê ye dorûberê gund hemû agir e"
Xelkê gundê Sergeleyê Pêşket Reşîd got: “Ev zêdeyî hefteyekê ye dorûberê gund hemû agir e, em li cihekî agir vedimirînin li cihekî din dîsa derdikeve. Jiyana xelkê li ser van mazî, berû û kezwanan e lê ev eqar hemû şewitandin. Tu agir li cihekî vedimirînî lê behneke din cihekî din li ber dikeve.”
Agir kêmtirî kîlometreyekê nêzîkî gundan bûye, bi gotina xelkê deverê li pişta Çiyayê Metînayê çend caran dûkel rabûye lê wan nekariye biçin wê derê.
"Li ser jiyana mirov û ajelan metirsiyeke cidî heye"
Xelkê Gundê Belaveyê Necîb Xalid jî got: “Topa eşawî gelek xeter e, nabêjin ev der gund e, bêvan e diavêjin û ka li kû derê ket. Ev tişt gelekî metirsîdar e li ser van her çar gundan. Li gundên Sergele, Bercî, Guhare û Belavê li ser jiyana mirov û ajelan metirsiyeke cidî heye.”
Artêşa Tirkiyeyê 18ê Tîrmehê operasyonek li devera Nihêlê daye destpêkirin û ew dever bi dijwarî tê bombebaran û topbarankirin.
Li gorî agahiyên Rûdawê zêdeyî heta niha zêdetirî 100 donim erd li wê devêrê şewitiye û hinek cih hene ku welatî nikarin agir li wan deran vemirînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse