Hewlêr (Rûdaw) - Komeleya Şaredariyên Almanyayê (Deutscher Städtetag) xwest ku pêvajoya dersînorkirina kesên ku mafê mana li Almanyayê wernagirin, bileztir bibe.
Komele diyar dike ku her çend hejmara penaxwazên nû kêm bûye jî rewşa bajaran hîn aloz e û pêdiviya wan bi piştgiriya darayî heye.
Birêvebirê Giştî yê Komeleya Şaredariyên Almanyayê Christian Schuchardt îro ragihand ku kêmbûna hejmara serlêdanan zexta li ser şaredariyan kêm kiriye lê pirsgirêkên bingehîn nehatine çareserkirin.
Hejmara penaxwazan nêzîkî ji sedî 50 kêm bûye
Li gorî amarên Ofîsa Federal a Koç û Penaberan (BAMF) di şeş mehên yekem ên îsal de hejmara serlêdanên nû li gorî heman dema sala borî nêzîkî ji sedî 50 kêm bûye.
Ji Kanûna Paşîn heta Hezîrana 2025an: 61 hezar û 336 serlêdanên nû
Ji Kanûna Paşîn heta Hezîrana 2024an: 121 hezar û 416 serlêdanên nû
Li gorî komeleyê, ev kêmbûn bûye sedem ku hewcedarî bi cihên niştecihbûnê yên demkî yên wekî konan nemîne.
Lê belê Schuchardt tekezî li ser wê yekê kir ku rewş li bajaran hîn jî aloz e û got:
"Rewş li wan cihan aloz dimîne. Pêwîst e bajar çavdêriya wan mirovên ku hatine cem me bike.
Cihên li dibistanan, cihên li baxçeyên zarokan û peydakirina xaniyan pirsgirêkên berdewam in.
Herwiha, saziyên koçberan gihiştine sînorê kapasîteya xwe."
Piştgiriya darayî û bilezkirina dersînorkirinê
Komeleya Şaredariyan ji ber vê yekê, du daxwazên sereke ji hikûmeta federal dike:
Piştgiriya Darayî: Divê alîkariyên darayî yên zêdetir bên dayîn da ku şaredarî karibin erkên entegrasyonê bi cih bînin.
Bilezkirina Dersînorkirinê: Divê proseya dersînorkirina kesên ku mafê mana li Almanyayê bi dest nexistine, "baştir û zûtir" were birêvebirin da ku bajar karibin çavkaniyên xwe ji bo alîkariya kesên ku "bi rastî pêwîstiya wan bi parastinê heye" terxan bikin.
