Hewlêr (Rûdaw) - Cenazeyê Rojîn Kabaîşa ku duh termê wê li qeraxa Gola Wanê hatibû dîtin, îro li Amedê hat veşartin.
Xwendekara zanîngehê Rojîn Kabaîşa 21 salî 27ê Îlonê li Wanê winda bûbû û duh termê wê li qeraxa Gola Wanê hatibû dîtin.
Tîmên pêwendîdar lêkolîna ewil li peravê kir û paşê jî term ji bo karên otopsiyê veguhast Saziya Tiba Dadî ya Wanê.
Cenazeyê Rojîn Kabaîşê piştî karên otopsiyê ji aliyê bavê wê Nîzamettîn Kabaîş û xizmên wê ve hat wergirtin.
Malbatê cenaze bir Amedê ew li Goristana Yenîkoyê ya li navçeya Baglarê defin kir.
Ji bilî malbat û xizmên wê, Hevseroka Şaredariya Bajarê Mezin a Amedê Serra Bucak jî beşdarî merasima cenaze bû û jinan darbesta Rojînê danî ser milên xwe.
Rojîn li Goristana Yenîkoyê ya Amedê hat veşartin
— RudawKurdi (@RudawKurdi) October 16, 2024
📌 Rojîn Kabaîş ji 27ê Îlonê ve winda bû û doh termê wê li peravên Gola Wanê hat dîtin
📌 Rojîn vê sibehê li bajarê xwe (Amed) hat veşartin
📹Abdulselam Akinci / Rûdaw pic.twitter.com/GgkYdSox5g
Çi bûbû?
Rojîn Kabaîşê 27ê Îlonê ji hevalên xwe re gotibû ku dê here peravên golê û keviran kom bike.
Rojîn Kabaîş xwendekara Zanîngeha Yuzuncu Yilê ya Wanê bû.
Piştî rojekê ku telefona wê li peravên golê hatibû dîtin li nav golê ji bo dîtina wê dest bi lêgerînê hatibû kirin.
Wezîrê Karên Navxwe yê Tirkiyeyê Alî Yerlîkaya doh ragihand ku cenazeyê wê li peravên Gola Wanê hatiye dîtin.
Rojîn li Goristana Yenîkoyê ya Amedê hat veşartin.
