Hewlêr (Rûdaw) - Serokê Herêma Kurdistanê Nêçîrvan Barzanî got “Em li bendê ne ku peywendiyên Herêma Kurdistanê û Iraqê bi Qeterê re baştir bibin.”
Serokê Herêma Kurdistanê Nêçîrvan Barzanî duh li Bexdayê bi Serokwezîrê Iraqê Mihemed Şiya Sûdanî, Serokê Parlamentoya Iraqê Mihemed Helbûsî û Mîrê Qeterê Şêx Temîm Bîn Hemed El Sanî re civiya.
Di derbarê hevdîtinê de Nêçîrvan Barzanî li ser hesabê xwe yê medya civakî parvekirinek kir û tê de got “Cihê şanaziyê ye ku ez îşev li Bexdayê bi Mîrê Qeterê Temîm Bîn Hemed El Sanî, Serokwezîrê Iraqê Mihemed Şiya Sûdanî, Serokê Parlamentoya Iraqê Mihemed Helbûsî û Xemîs Xencer re civiyam.”
Barzanî balkişand li ser giringiya serdana Şêx Temîm a ji bo Iraqê û wiha anî ziman “Serdana Şêx Temîm bo Iraqê pêşkeftineke berçav di peywendiyên di navbera miletên me de nîşan dide. Em li bendê ne ku peywendiyên Herêma Kurdistanê û Iraqê bi Qeterê re baştir bibin.”
It’s an honor to meet Sheikh @TamimBinHamad, Amir of Qatar tonight in Baghdad, along with Iraqi Prime Minister @mohamedshia, Speaker @AlHaLboosii and @khameskhanjar. Sheikh Tamim’s visit to Iraq underscores significant progress in ties between our nations. We look forward to… pic.twitter.com/056QX5tuaB
— Nechirvan Barzani (@IKRPresident) June 15, 2023
Li aliyê din Serokwezîrê Iraqê Mihemed Şîa El Sûdanî li Firokexaneya Navdewletî ya Bexdayê pêşwaziya Mîrê Qeterê Şêx Temîm Bin Hemed El Sanî kir.
Piştî hevdîtina Sûdanî û Al Sanî di navbera her du welatan de peymaneke hevpar a li ser gelek waran hat îmzekirin. Di navbera Iraq û Qeterê de ji bo xwediyên pasaportên dîplomatîk peymana bê vîzeyê hat îmzekirin.
Serokwezîrê Iraqê di civîna çapemeniyê ya hevpar a li gel El Sanî de diyar kir ku serdana Mîrê Qeterê ji bo Iraqê nîşana têkiliyên xurt ên di navbera her du welatan de ye û got "Dewleta Qeterê dê li herêmê yek ji bihêztirîn hevalbendên me bimîne."
Sûdanî bal kişand ser wê yekê ku li Iraqê aramiya ewlehî û siyasî heye û got ku di hevdîtinê de mijara ewlehiyê hatiye gotûbêjkirin.
Herwiha Sûdanî got: "Niyeta Qeterê heye ku beşdarî xebatên geşepêdana Iraqê bibe. Iraq jî amade bû ku bi welatên bira re ji bo aştî û pêşketinê kar bike."
Mîrê Qeterê El Sanî jî diyar kir ku di navbera Iraq û Qeterê de têkiliyên kûr hene û dibêhe “Me bi serokwezîrê Iraqê re li ser qebareya bazirganiya hevpar a di navbera her du welatan û pêşxistina wê de li hev kir. Me li ser xurtkirina têkiliyan di warên enerjî, bazirganî û aborî de li hev kir û di van waran de memorandumeke hevpar îmze kir. Me projeyên herêmê, bi taybetî projeya niha ya elektrîkê nirxand. Em giringiya Iraqê li navçeyê dizanin û aramiya Iraqê jî tê wateya aramiya navçeyê.”
