Hewlêr (Rûdaw) - Serok Barzanî li Hewlêrê di roja dawî ya bangeşeya hilbijartinên Parlamentoya Kurdistanê de ragihand ku karê yekem ê xula bê ya Parlamentoya Kurdistanê nivîsandina Destûrê ye.
Partiya Demokrat a Kurdistanê (PDK) li Hewlêrê di roja dawî ya bangeşeya hilbijartinên Parlamentoya Kurdistanê de mîtîngek saz kir.
Serokê Giştî yê Partiya Demokrat a Kurdistanê (PDK) Mesûd Barzanî di mîtînga li Stadyûma Franso Herîrî de gotarek pêşkeş kir.
Li gorî zanyariyan herî kêm 35 hezar kes tevlî mîtînga Partiya Demokrat a Kurdistanê (PDK) bû.
Serok Mesûd Barzanî di gotara xwe de spasiya saziyên PDKyê kir û got:
“Tevî bikaranîna zimanê tund û gotinên ne xweş ên ji aliyê hin partiyan ve, ez spasiya hemû saziyên PDKyê dikim ku nehatine wê asta hinekan dixwest PDKyê bikşînin.”
Serok Barzanî behsa karên kabîneyê jî kir û da zanîn:
“Daxwazên gelê Kurdistanê dê bibin bernameya kabîneya bê.
Ew dê xizmeta zêdetir, ewlehî û sivikkirina barê gelê Kurdistanê pêşkeş bike.
Nabe ku em piştî hilbijartinan vê atmosferê bibînin û ev atmosfer li Kurdistanê bimîne.
Yek herêm, yek parlamento, yek hikûmet, yek hêza Pêşmergeyan, bidawîanîna hevpeymaniya mafya û terorê.
Ya herî girîng jî, bidawîanîna bazirganiya madeyên hişbir û çêkirina wê ku metirsiya herî mezin a li ser paşeroja vî gelî ye û xiyaneta herî mezin a li dijî vî gelî ye.”
"Silav li Kerkûka ku du caran hatiye firotin"
Serok Barzanî di beşeke axavtina xwe de ji xelkê pirsî:
"Hûn dê dengê xwe bidin ên ku Kurdistanê diparêzin an ên ku Kurdistanê difiroşin?"
Serok Barzanî diyar kir ku ew dê piştî hilbijartinan destê biratiyê dirêjî hemû aliyan bikin û got:
“Xwezî dirûşmên partiyên din jî ji bo projeyên baştir, xizmetên baştir, yekîtî û biratiya kûrtir bûna ku bi PDKyê re hevrikiyê bikin.”
Serok Barzanî di beşeke din de amaje bi bûyerên piştî Referandûma Serxwebûna Kurdistanê û 16ê Çiriya Pêşîna 2017an kir, silav li bajaran kir û got:
"Silav li Kerkûka ku du caran hatiye firotin, silav li Silêmaniyê, li Dihokê, li Hewlêrê."
Serok Barzanî di axaftina xwe de amaje bi aloziyên li Rojhilata Navîn jî kir û rewş wekî hestiyar bi nav kir û got:
“Em bi Bexdayê re li ser xetê ne ku Îraq û Herêma Kurdistanê ji vî agirî dûr bixin.”
Serok Barzanî her wiha behsa pêwendiyên Hewlêr û Bexdayê jî kir û tekezî li ser wê yekê kir ku bi pabendbûna bi destûr û rêkeftinan dê pirsgirêk werin çareserkirin.
20ê mehê dê hilbijartinên Parlamentoya Kurdistanê werin kirin.
Roja dawî ya bangeşeya hilbijartinên Parlamentoya Kurdistanê ye
— RudawKurdi (@RudawKurdi) October 15, 2024
Serok Mesûd #Barzanî li Hewlêrê axivî:
Hûn dê dengê xwe bidin ên ku Kurdistanê diparêzin an ên ku Kurdistanê difiroşin?#Kurdistan pic.twitter.com/cRkVPN8NSe
